“Azərbaycandan öz kursunu dəyişməyi tələb etməsi mənasızdır”
26-01-2018, 08:58
Avropa Şurasının insan haqları üzrə yeni komissarı seçilib. Modern.az xəbər verir ki, Avropa Şurası Parlament Assambleyasının qış sessiyasında keçirilən səsvermənin nəticələrinə əsasən bu posta Dünya Miyatoviç seçilib.
Xanım komissardan əvvəl Avropa Şurasının insan haqları üzrə komissarı olan Nils Muyjnieksin “Turan”ın müxbiri ilə söhbətində Azərbaycanla bağlı səsləndirdiyi bəzi fikirlər ölkəmizdə ciddi etiraz doğurub. Jurnalist Əfqan Muxtarlıya oxunan 6 illik cəzanı pisləyən, REAL sədri İlqar Məmmədovun azad edilməsini tələb edən Nils Muyjnieksin Azərbaycan qarşısında şərt qoyub. O bildirib ki, Bakı Avropa ilə münasibətləri yaxşılaşdırmaq istəyirsə, kursu dəyişməlidir.
Onun bu fikirlərinə fərqli reaksiyalar var.
“Azərbaycan” qəzetinin baş redaktoru Bəxtiyar Sadıqov Azərbaycanın kursu dəyişməyə dəvət edilməsinin Avropa Şurasının hələ də ikili standartlardan çıxış etdiyini göstərdiyini söylədi: “Azərbaycanın özünün kursu var. Bu kurs Heydər Əliyev kursu adlanır. Eyni zamanda bu kurs 12 noyabr 1995-ci il konstitusiyasında nəzərə alınıb və ümumxalq referendumu, səsverməsi ilə qəbul olunub. Müstəqil Azərbaycan da bu kursla inkişaf edir. Bu da fundamental demokratiyanın prinsiplərinə sadiqdir, insan haqlarının qorunması, vətəndaş cəmiyyətinin, söz və ifadə azadlığının təmin olunmasıdır. Azərbaycan bu kursda öz milli maraqlarına uyğun addım atır. Beynəlxalq qurumlar və dövlətlərlə münasibətlər qurularkən bu kursa sadiqlik var. Azərbaycan yalnız öz milli və dövlət maraqlarını əsas götürür. Bu kursdan nə Azərbaycan xalqının, nə də dövlətinin dönmək fikri yoxdur. Biz işğal olunmuş ərazilərimizi azad etmək yolunu tutmuşuq. Beynəlxalq qurumlar qəbul etdikləri qərarlara əməl etmirlər. Təkcə BMT-nin 4 qətnaməsini xatırlatmaq kifayət edər. Öz sənədlərinə məhəl qoymurlar, yalnız Azərbaycana irad tutmaqla məşğuldurlar.
Biz yaxşı bilirik ki, Avropa Şurasının qərarları tövsiyə xarakteri daşıyır. Azərbaycana qarşı münasibətdə bunlar hökmlə çıxış etmək istəyirlər. Ölkəmiz nə edirsə, öz maraqları, demokratiya, xalqının maraqlarını təmin etmək naminə edir. Bu isə kimlərisə qane etmir. Çalışırlar ki, Azərbaycan özünün deyil, başqa dövlətlərin maraqlarını üstün tutsun. Avropa Şurası və digər beynəlxalq qurumlar ikili standartları əllərində tutaraq, başqa dövlətlərə münasibətdə deyil, Azərbaycana qarşı münasibətdə daim qərəzli mövqe tuturlar. Heç bir əsası olmadan anti-Azərbaycan şəbəkəsinin verdikləri köhnə arayışlar əsasında bunlar rəylər verirlər. Görünür, bunlar onları qane edir. Cənab prezident iki gün öncə Davosda olarkən mətbuat və söz azadlığı ilə bağlı verilən suala cavab verəndə bütün bunlara çox dəqiq və aydın şəkildə cavab verdi, məsələnin mahiyyətini aydınlaşdırdı. Yaxşı olardı ki, ikili standartlardan əl çəkilsin. İndiyə qədər kimsə Azərbaycanla təzyiq dili ilə danışıbsa, ölkəmizə nəyisə diktə etmək istəyibsə, uğursuzluğa düçar olub. Yaxşı olardı ki, onlar qərəzsiz, obyektiv olsunlar, Azərbaycanın ən mühüm probleminin həllində ona kömək etsinlər. Əgər Azərbaycanda hansısa bir sahədə nöqsan görürlərsə, bunu dostcasına yanaşıb, bu şəkildə də sözlərini desinlər. Hansısa bir nöqsan olanda biz özümüz maraqlıyıq ki, onu sürətlə aradan çıxaraq ki, inkişafımıza mane olmasın. Belə bir xeyirxah yanaşma ilə həm bizə kömək edərlər, həm də öz hörmətləri artar. Amma hökmlə danışmaq, hətta Azərbaycandan öz kursunu dəyişməyi tələb etməsi mənasızdır, bunlar heç bir effekt verməyəcək”.
Hüquq müdafiəçisi Səidə Qocamanlı bildirdi ki, Azərbaycan Avropa Şurasına daxil olandan üç komissarla çalışıblar: “Artıq seçilən 4-cü komissarla işləyəcəyik. Üçüncü komissar olan Muyjnieks daim Azərbaycana qarşı qərəzli mövqeyi ilə seçilib. Ondan əvvəlki iki komissar ölkəmizə gəlib ümumi vəziyyətlə tanış olandan, eləcə də siyasi məhbuslarla görüşəndən sonra olan problemləri həll etmək yollarını elə aparırdılar ki, biz bunun müsbət nəticələrini az vaxt ərzində görürdük. Nəticədə kifayət qədər də böyük işlər görülürdü. 716 nəfərlik vaxtilə siyasi məhbus siyahımız var idi. Onların işlərinin böyük bir qisminin həll olunmasında bu şəxslərin müstəsna xidmətləri olub. Onlar danışmağı bacarırdılar. Muyjnieks komissar olduğu müddətdə Azərbaycanla daim amiranə dillə danışıb. Azərbaycana qarşı bu cür cümlə işlətməklə nə demək istədiyini, hər halda, açıqlasın. Azərbaycanda insan hüquqları ilə bağlı problemlər var. Bu problemlərlə biz də məşğuluq. Bunlar çox ciddi problemlərdir və bunu bilməmiş deyilik. Bu problemləri elə həll etmək lazımdır ki, aqressivlik olmasın. Ölkəni aşağılamaqla problem həll olunmur. Dunya Miyotoviçə böyük ümidlərimiz var. O, Azərbaycanı yaxşı tanıyır, problemləri yaxşı bilir. Ölkəmizdəki söz azadlığı ilə bağlı kifayət qədər məlumatlıdır. Hər halda, bundan sonra onunla olacaq görüşlərimizdən sonra o, Azərbaycanda olan problemlərin aradan qaldırılmasına var gücü ilə çalışacaq. Ümid edirik ki, Avropa İnsan Hüquqları komissarı kimi müsbət imici yenidən geri qaytaracaq”.
“Yeni Müsavat”
Geri qayıt