ÜAK-ın ləğvinə cəhd Azərbaycan ictimaiyyətində narahatlıq yaradıb
15-05-2017, 08:14
Rusiya Ədliyyə Nazirliyinin Ümumrusiya Azərbaycanlıları Konqresinin (ÜAK) ləğv edilməsi barədə bu ölkənin Ali Məhkəməsi qarşısında iddia qaldırması anlaşılmaz addımdır.
Bu barədə Trend-ə açıqlamasında millət vəkili Elman Nəsirov deyib.
Onun sözlərinə görə, bu addım Rusiya-Azərbaycan strateji tərəfdaşlığının yüksələn xətlə inkişafına kölgə salır:
"İki ölkə arasında münasibətlər çox parametrlərlə inkişaf etməkdədir. Fundamental məsələlərdə Azərbaycanla Rusiyanın mövqeyi üst-üstə düşür. Bəzi ölkələrin, xüsusən də Amerika Birləşmiş Ştatlarının Rusiyaya qarşı tətbiq etdiyi sanksiyalara Azərbaycan heç vaxt qoşulmayıb. Hətta həmin ölkələr tərəfindən Azərbaycana bununla bağlı təzyiqlər də edilib. Amma buna baxmayaraq, Azərbaycan heç vaxt Rusiyaya qarşı sanksiyalara qoşulmayıb".
Deputat həmçinin qeyd edib ki, Rusiyada müəyyən siyasi dairələrin, ermənipərəst qüvvələrin məqsədi Bakı ilə Moskva arasındakı inkişafda olan münasibətlərə xələl gətirmək, iki dövlətin münasibətlərini korlamaqdır: "ÜAK hər zaman Rusiya-Azərbaycan münasibətlərinin inkişafına tövhə verib, iki dövlətin xalqları, vətəndaş cəmiyyəti institutları arasında münasibətlərin inkişafına yardım edib. Rusiya Ədliyyə Nazirliyinin bu konqresin ləğv edilməsi üçün qaldırdığı iddia Azərbaycan ictimaiyyətində narahatlıq yaradıb. Bu cür antiazərbaycan dairələrin, ermənipərəst qüvvələrin niyyətinin həyata keçməsinə imkan vermək olmaz. İnanırıq ki, Rusiya rəhbərliyi bu məsələyə obyektiv müdaxilə edəcək və antiazərbaycan dairələrin bu niyyəti baş tutmayacaq".
Qeyd edək ki, mayın 15-də Rusiya Ədliyyə Nazirliyinin ÜAK-ın qeydiyyatının ləğv edilməsi iddiası ilə bağlı məhkəmə prosesi keçiriləcək.
Geri qayıt