Adil Vəliyev nədən sakinlərdə narazılıq yaratmağa meyl edir?
24-06-2015, 10:56
Ölkə prezidenti cənab İlham Əliyevin gərgin əməyi sayəsində Azərbaycan sürətli inkişaf yoluna qədəm qoyub. Bu inkişaf bütün sahələrdə özünü büruzə verməkdədir. Məhz ölkə rəhbərliyinin atdığı təqdirəlayiq addımların nəticəsində bu gün Bakı və regionlar görkəmini xeyli dəyişib, vətəndaşların sosial rifah halı yüksəlib. Təəssüf ki, bəzi yerli və mərkəzi icra hakimiyyəti orqanlarının rəhbər şəxsləri görülən işlərə öz töhfələrini vermək əvəzinə qanunsuz əməllər törədirlər.
Təbii ki, belə işlərə qol qoyan vəzifə sahibləri gec-tez ölkə başçısının tənqidinə tuş gəlir və qanuni şəkildə cəzasını alır. Bəzi hallarda cəza tədbirləri belə bəzi məmurları özbaşına əməllərdən çəkindirməyə yetmir. Məsələn, Sabunçu Rayon İcra Hakimiyyətinin (RİH) başçısı Adil Vəliyev vəzifəyə təyin olunan gündən bu yana ondan şikayətlər səngimək bilmir. Bu barədə bir qədər sonra müfəssəl danışacağıq. Xatırladaq ki, qəzetimizin əvvəlki saylarından bir neçəsində Sabunçu rayonu, Bakıxanov qəsəbəsi Əhmədbəy Ağayev küçəsi, 22 nömrəli binanın sakinlərinin şikayət yazıları dərc olunmuşdu. Vətəndaşlar bildirmişdilər ki, Eldar Aslanov adlı iş adamı onların yaşadığı binanın qarşısındakı yaşıllıqları məhv edərək burda özünə fərdi yaşayış sahəsi tikdirib. Tikintinin layihəsi isə Sabunçu Rayon İcra Hakimiyyətinin başçısı ilə razılaşdırılıb. Qəzetimizdə dərc olunan silsilə məqalələrdən sonra məsələ daha da böyüdü. Nəhayətdə, icra hakimiyyətinin rəsmiləri işə qarışmalı oldular. Bir müddət tikinti dayandırıldı. Aradan bir neçə gün keçdikdən sonra isə sözügedən ünvanda tikinti işlərinə yenidən start verildi. Məlum şikayətlə bağlı qəzetimizdə dərc olunan axırıncı yazıdan sonra hələ ki, tikinti işləri tam olaraq dayandırılıb. Dünən bina sakinləri redaksiyamızla əlaqə saxlayıb bəzi maraqlı məlumatlar verdilər: "Əvvəla, bu işdə bizə yaxından yardımçı olduğunuz, şikayətimizi işıqlandırdığınız üçün sizə öz təşəkkürümüzü bildiririk. Hazırda ərazidə tikinti işləri dayandırılıb. Ancaq biz yenə də narahatıq. Tikinti işlərini gördürən Eldar müəllim gözləyir ki, söz-söhbət yatışsın, sonra işə başlasın. Biz birmənalı şəkildə tikilinin sökülməsini istəyirik. Bura bizim istirahət yerimiz olub, uşaqlarımız oynayır və özümüz ağacların kölgəsində dincəlmişik. Son günlər havalar isti keçir, evdə bağrımız çatlayır. İndi həmin yaşıllıqdan əsər-əlamət qalmayıb. Bu günlərdə Eldar Aslanovla bizim aramızda qarşıdurma oldu. Əraziyə gələn iş adamı əvvəlcə bizimlə sakit tərzdə danışdı və "mən namaz qılan adamam, heç yerə şikayət etməyin. Bura filan qədər xərc çəkmişəm" deyə bildirdi. Lakin biz onun bu sözlərinə əhəmiyyət vermədik. Çünki söhbət neçə illərdir qulluq edib böyütdüyümüz ağacların bir göz qırpımında məhv olunmasından gedir. Etirazımızın davam etdiyini görən iş adamı daha sonra səsinin tonunu yüksəldərək bizi həbs etdirəcəyi ilə hədələdi. Biz nə iş adamının, nə də icra hakimiyyətinin rəsmilərinin hədələrindən qorxuruq. Bu işdə səhv olsaydıq, səsimizi çıxarmazdıq. Gün kimi aydındır ki, haqqı tapdalanan bizlərik. Bura sökülməlidir, başqa cür ola da bilməz. Sabunçu Rayon İcra Hakimiyyəti layihəni təsdiqləyəndə gəlib baxmalı idi ki, hansı ərazidə tikintiyə icazə verir. Allah prezidentimiz İlham Əliyevin canını sağ eləsin. O hər rayonda, hər qəsəbədə yaşıllıq sahələrinin artırılması üçün çalışır. İcra başçısı isə onlarla ağacın olduğu ərazidə qanunsuz tikinti işlərinin aparılmasına rəsmi icazə verib. Özbaşına əməllərinə görə Adil Vəliyev qanun qarşısında cavab verməlidir". Apardığımız araşdırmalar göstərir ki, 2012-ci ilin aprel ayından Sabunçu Rayon İcra Hakimiyyətinə rəhbərlik edən A.Vəliyev indiyə qədər yerli sakinlərin etimadını qazana bilməyib. Məlumat üçün bildirək ki, o əmək fəaliyyətinə 1977-ci ildə BEMZ-də çilingər kimi başlayıb. 1978-1980-cı illərdə hərbi xidmətdə olub. 1980-1990-cı illərə qədər fasiləsiz olaraq əmək fəaliyyətini BEMZ-də davam etdirib. 1990-1992-ci illərdə Nərimanov Rayon İcra Hakimiyyətində şöbə müdiri və Nərimanov Rayon İcra Hakimiyyəti başçısının müavini, 1992-1996-cı illərdə Bakı şəhər Xalq deputatları sovetində təlimatçı və şöbə müdiri, 1998-2003-cü illərdə Dövlət Neft Şirkətinin Dənizdə Neft-Qaz İstehsalat Birliyinin MMTİ-nin rəis müavini vəzifələrində işləyib. 2003-2012-ci illər ərzində özü təsis etdiyi "Euro style" LTD şirkətində çalışıb. Yəni onun fəaliyyətinin əhəmiyyətli dövrü sırf biznes layihələri ilə bağlı olub. Deyilənə görə, icra başçısı hazırda da aktiv biznes fəaliyyəti ilə məşğuldur. Əslində, məmurun borcu Sabunçu rayonunun sakinlərinə xidmət etmək və vətəndaşların problemləri ilə maraqlanmaqdır. Yerli sakinlərin mətbuatdakı çıxışlarından məlum olur ki, icra başçısı nəinki onları qayğılandıran problemləri həll edir, əksinə vətəndaşlara əlavə çətinliklər yaradır. Məsələn, bir müddət əvvəl sakinlər mətbuat orqanlarına müraciətlərində icra başçısının rayonda abadlıq işləri adı altında yaşıllıqları məhv etdiyini bildiriblər: "Biz Sabunçu rayonuna yeni başçı təyin olunanda çox sevindik. Allahtərəfi ilk ayı pis olmadı. Amma sonradan bu sevincimiz yasa döndü. Belə ki, icra başçısı abadlıq işləri altında rayonu başdan sona kimi qazdı, ticarət obyektlərini sökdürdü. Rayon ərazisində bir metr belə boş torpaq sahəsi tapa bilməzsiniz. Vəziyyət o həddə çatıb ki, başçının göstərişiylə vaxtı ilə mərhum prezidentimiz Heydər Əliyevin əmri əsasında salınan yaşıllıqlar məhv edilərək yeri ayrı-ayrı biznesmenlərə satıldı. Adil Vəliyevin sərəncamına əsasən rayonun Fətəliyev küçəsi 29-30 nömrəli binalarının birinci mərtəbəsində hər iki tərəfində, pəncərələrimizin işığını kəsərək qarşısında ticarət obyekti tikdilər. Səməd bəy Mehmandarov prospekti 40-42-38 nömrəli binaların qarşısındakı mini parkdakı və "Kapital Bank"ın 2 saylı filialının yaxınlığında, transformator stansiyasının yanındakı ağaclar kəsilərək ərazi tikinti şirkətinə satıldı. Daha hansı faktları sadalayaq?". Narazı sakinlərin də dediyi kimi, icra başçısı fəaliyyətinin yalnız ilk aylarında özünü müsbət tərəfdən göstərməyə çalışıb və bunun üçün müxtəlif tədbirlərə əl atıb. Xatırladaq ki, başçının sərt addımı Balaxanı qəsəbə üzrə icra nümayəndəsi Fərhad Qurbanovun işdən çıxarılması zamanı olmuşdu. Qəsəbədə keçirilən görüş zamanı sakinlər verilən, amma tutulmayan sözlərdən bezdiklərini bildiriblər. Onlar həmçinin uzun zamandır həll olunmayan problemlərindən gileyləniblər. Vətəndaşlar əsasən qəsəbənin yollarının bərbad halda olmasından, kanalizasiya xəttinin olmamasından və bəzi sənədləri almaq üçün onlardan rüşvət tələb olunduğundan şikayətləniblər. Görüşdə çıxış edən başçı isə bunları demişdi: "Mən buraya sizin bütün problemlərinizi, dərdinizi dinləməyə və həll etməyə gəlmişəm. Hər kəs bir-bir öz sualını, problemini desin. Biz də həll yolunu tapmağa çalışaq". Sakinlər əsasən qəsəbə icra nümayəndəsi Fərhad Qurbanovdan şikayətlərini dilə gətiriblər. Vətəndaşların sözlərinə görə, icra nümayəndəsi onlardan rüşvət tələb edib və bəzi sakinlər də məcbur qalıb bu pulları veriblər: "Fərhad Qurbanov özbaşına hərəkətlər edir. Çox adamdan onların sənədlərini həll etmək üçün pul istəyib. Bəzən də məcbur qalıb tələb etdiyi pulları vermişik. Başqa yolumuz yox idi. Amma artıq boğaza yığılmışıq. Hamımız ondan narazıyıq və dəyişdirilməsini istəyirik". Elə görüş zamanı başçı icra nüməyəndəsini vəzifəsindən çıxardı. Və bu hadisə yerli sakinlərin başçıya olan inamını artırdı, amma... Maraqlıdır ki, aradan bir neçə ay keçdikdən sonra Balaxanı sakinlərini cana doydurmuş icra nümayəndəsi yenidən vəzifəsinə bərpa edildi. İddialara əsasən, bunun qarşılığında F.Qurbanov icra başçısına 60 min dəfə minnətdarlıq edib. Bu isə o deməkdir ki, rayon rəhbəri bəzi yerli məmurların özbaşına əməllərinə qarşı mübarizədə zəif təsir bağışlayır. Yaxud da başı biznes işlərinə qarışdığından yerli məmurların fəaliyyəti ilə maraqlanmağa vaxt tapmır. Fikrimizcə, bu variant həqiqətə daha yaxındır. Çünki Sabunçu RİH rəhbərinin biznes imperiyası həddən artıq böyükdür və bu barədə mətbuatda dəfələrlə informasiya verilib. Belə ki, "Volkswagen", "Audi", "Seat", "Porsche" avtomobil markalarının ölkəmizdəki rəsmi dilerləri ona məxsusdur. Bundan başqa, icra başçısının ölkədə böyük tikililəri, mağazaları, şadlıq evlərinin olduğu da bildirilir. Bu arada, Adil Vəliyevin özü ilə yanaşı, yaxın qohumları da yağ-bal içində yaşayır. Məsələn, məmurun bacısı oğlu Şamil Həsənov kefinə korluq çəkdirmir, oliqarxlara məxsus həyat tərzi keçirir. Hələ üstəlik bunu sosial şəbəkələrdə də ictimailəşdirir. Bir müddət öncə bu gəncin sosial şəbəkələrdə maraqlı fotoları yayılıb. Həmin şəkillərə diqqətlə baxanda icra başçısının bacısı oğlunun sürdüyü maşınları, yaşadığı bahalı həyatı görməmək mümkün deyil. Hər halda onun sürdüyü maşınların hər birinin qiyməti bir professorun bütün ömrü boyu aldığı maaşdan artıqdır. Hələ onun hər gün nə qədər xərclədiyini, nələr geyinib, nələr yediyini və haralarda əylənməsini nəzərə almazsaq təbii ki. Buna nə sözünüz var, Adil müəllim? Biz hələ başçının oğlunun hansı işlərlə məşğul olmasından yazmırıq. Amma bu barədə də yaxın günlərdə maraqlı faktları ortaya qoyacağıq. Qeyd edək ki, icra başçısı ötən açıqlamalarından birində "Cənab prezident mənə etimad edib bu vəzifəyə təyin edibsə, mən də yüksək səviyyədə əhaliyə xidmət etməyə borcluyam" sözlərini işlədib. Əfsuslar olsun ki, məmurun sözləri ilə əməli üst-üstə düşmür. Növbəti saylarımızda Adil Vəliyevlə keçmiş müavini, yaxın dostu və nəhayət biznes ortağı Şakir Alıyevin arasındakı milyonluq qalmaqal, Maştağadan keçən ömür yolu və digər məsələlər haqqında maraqlı yazı dərc edəcəyik. Bizi izləməyi unutmayın. \\ gundelik-baku.com \\
Geri qayıt