Xəzər Aslanov viran qoyduğu ticarət mərkəzini kimlərdən nə üçün gizlədir?
24-02-2015, 11:37
Xızı rayon icra aparatının başçısı Xəzər Aslanovun rayonda fermerlərə yaratdığı süni maneələr barədə məlumatlar vermişik. Qeyd etmişdik ki, rayonun əlaqədar yerli strukturları dövlət tərəfindən fermerlər üçün ayrılmış subsidiyalara ortaqlıq etməklə əslində, aqrar sektorun işini iflic etmişlər.
Təəssüf ki, belə əməllərdən əziyyət çəkən təkcə fermerlər deyil. Rayonda bir müddət öncə ticarət mərkəzini texnika ilə yerlə-yeksan edən başçı fərdi sahibkarlığın inkişafına da süni maneələr yaradır. Digər tərəfdən, Xızıda yerli kadrların potensialından da demək olar ki, istifadə edilmir. Azərbaycana Müşfiq, Cəfər Cabbarlı, Cabir Novruz, Nəbi Xəzri kimi şəxsiyyətlər bəxş etmiş bu torpağın övladları bu günün özündə də əməli fəaliyyətləri ilə dövlətimizə və dövlətçiliyimizə öz töhfələrini verməkdədir.Lakin hansısa səbəblərdən Xızının icra başçısı bu incəliklərin təfərrüatına varmadan addımlar atır. Nəticədə isə neçə-neçə təcrübəli mütəxəssis yerli dövlət strukturlarından uzaqlaşdırılır. Görünür, Xəzər Aslanova onun əməllərinə haqq qazandıran, dilsiz-ağızsız "icraçılar" sərf edir. Əlbəttə, axtarsan belələri Xızıda yetərincədir.Ədalət naminə qeyd etməliyik ki, başçının iki müavininin şəxsində "başının dəstəsi" kifayət qədər canfəşanlıq etməklə üzərinə düşən "vəzifələri" yerinə yetirərək ona qarşı görünməmiş sədaqət nümayiş etdirməkdədir. Düzdür, bu məsələdə müavinlər Azər Əlizadə ilə Arzu Əzizov arasında zaman-zaman söz toqquşmaları baş verir. Yadınızdadırsa, belə toqquşmalardan biri icra başçısı Xəzər Aslanov üçün Xızıda tikilən sayca üçüncü mülk üstündə düşmüşdü. Yəni Azər müəllim deyirdi ki, başçı cənabının mülkünü hədiyyə olaraq mən tikəcəyəm. Arzu müəllim isə etiraz edərək bu "mühüm" tapşırığı özü icra edəcəyini israr etmişdi. Deyilənə görə, o vaxt başçı tərəfləri "konsensus"a dəvət edərək hər iki tərəfin peşkəşini qəbul etməyə hazır görünmüş, hələ bir bığaltı qımışmışdı da. Yeri gəlmişkən, rayon icra başçılarının rəhbərlik etdikləri bölgələrdə özlərinə cah-cəlal qurması yeni mövzu deyil. Bu barədə mətbuatda kifayət qədər məlumatlar dərc olunub. Təbii ki, bu məlumatları bütün icra başçılarına aid edə bilmərik. 2012-ci ildən Xızı rayonuna rəhbərlik edən Xəzər Aslanovun rayonda artıq 3 mülkü olduğu bildirilir. Hər mülkün də dəyəri milyonlarla qiymətləndirilir. Lakin Şimal bölgəsində Xəzər Aslanov üçün örnək olası icra başçıları da az deyil. Xəzər müəllim bilməmiş olmaz, Xaçmaz rayonunun icra başçısı vəzifəsində 2004-cü ildən çalışan Şəmsəddin Xanbabayev hələ də Xaçmazın qonaq evində yaşayır. Etiraf etməliyik, dövlət başçısının "Şöhrət" və "Şərəf" ordenləri ilə təltif etdiyi Şəmsəddin müəllimin səmimiyyəti alqışlara layiqdir. 2011-ci ildən Siyəzən rayonuna rəhbərlik edən Arif Qasımovun da ailəsi ilə qonaq evində yaşadığı barədə məlumatlar var. Bu faktın özü Arif müəllim üçün əlavə ehtiram və başucalığı gətirir. Bəs Xəzər müəllim necə? Xızı camaatında özünə qarşı hansı "yaddaş qutusu" formalaşdırıb? Bunun üçün uzağa getməyə ehtiyac yoxdur. Xızının yaşadığı sosial problemlərə ötəri bir nəzər salmaq kifayətdir.Çünki, Xızı camaatı çoxsaylı problemlərin səbəbkarı kimi, məhz Xəzər Aslanovu nişan verir. Giləzi-Xızı yolu ilə şəhərə daxil olanda, Heydər Əliyev prospekti ilə Bəşir Səfəroğlu küçəsinin kəsişməsində, işıqforun yaxınlığında ticarət mərkəzinin xarabalıqları yerləşir. Əlillər üçün tikilmiş bina ilə üzbəüz olan bu xarabalığı kənar gözdən gizlətməyə çalışan rayon icra strukturları rəhbərləri burada nəhəng plakat yerləşdiriblər. Maraqlıdır ki, vaxtilə söküntüsü zamanı az qala bütün respublikanı lərzə gətirmiş bu "əməliyyatdan" sonra Heydər Əliyev parkının əhatəsindəki geniş ərazidə vur-tut 2 obyekt salamat qalıb. Onlardan biri Mərkəzi rayon xəstəxanasının yaxınlığındakı çörək mağazası, digəri isə "Ləzzət" kafesidir. Ticarət mərkəzi viran qoyulsa da, rayon İcra Hakimiyyətinin inzibati binasının lap yaxınlığında, Vüsaqi küçəsində yerləşən "Ləzzət" kafesinə nədənsə toxunan olmayıb. Xızı camaatı haqlı olaraq bunun əsl səbəblərini araşdırmağa girişib. İlkin araşdırmalardan sonra məlum olub ki, kafe icrada işləyən məmurlardan birinin nəzarətindədir. Qəribədi, "Mədain xarabalıqları"nı xatırladan Xızı ticarət mərkəzinin viranəliklərini bu yerlərə tez-tez baş çəkən hörmətli qonaqların və izzətli səlahiyyət sahiblərinin gözündən gizlətmək üçün doğrudanmı yekə bir plakat bəs edir? Və görəsən, əvvəl-axır kimsə dilə gəlib soruşacaqmı bu viranəliyn hesabatını? Elə bilirsiniz, Xızının icra başçısı Xəzər Aslanov ticarət mərkəzini yerində yeni müasir arxitektura qaydalarına uyğun obyekt tikdirmək üçün sökdürüb? Əgər belədirsə, bə niyə indiyəcən xarabalıqları plakat arxasında gizlədir? Ola bilsin sandıq ovqatında rayonda vaxtını öldürən başçı və onun başının dəstəsi üçün bu məsələ hələ ki, aktual deyil. Dövlətimizin başçısının yerli icra strukturları rəhbərlərinin qarşısına qoyduğu vəzifələrlə daban-dabana ziddiyyət təşkil edən belə əməllər cəzasıq qalmayacaq! Bəs digər söküntülər necə, aktualdırmı? Xəzər Aslanovun rayonda sahibkarlara qarşı səlib yürüşünün acı nəticələri tək bununla məhdudlaşmır. Xızı şəhərindən təxminən 10- 15 km. məsafədə, Bakı-Altıağac yolunun kənarında fəaliyyət göstərən 2-3 kafe də məhkəmə qətnaməsi çıxarılaraq sökdürüldü. Nəticədə isə artıq Xızı şəhərində yerləşən ticarət və iaşə obyektlərinin sahibləri çökdürüldü. İndi həmin sahibkarları axtarsan Xızı rayon məhkəməsində ədalət axtarışına çıxdığını görərsən. Ümumiyyətlə, Xızı rayonunun yerli icra orqanlarının bu biabırçı söküntü əməliyyatlarında rayon məhkəməsinə arxalandığı deyilir. Bildirilir ki, Xızı rayon məhkəməsinin sədri İsgəndər Hacıyevin işi-gücü obyekt uçuranlara məhkəmə qətnaməsi vasitəsilə "indulgensiya" paylamaqdır."İndulgensiya"nın hakimə hansı konkret dividendlər gətirməsi əslində ciddi müzakirə mövzusudur. Bu barədə Xızı sahibkarlarının kifayət qədər narazılığı var. Məsələ ilə bağlı yaxın saylarımızda geniş məlumat verməyə çalışacağıq. Onu da bildirəcəyik ki, Xızı rayon məhkəməsinin hakimi İsgəndər Hacıyevi sahibkarlara qarşı sərt hücumlara baş vurmuş Xəzər Aslanovun tapşırıqlarını demək olar ki, qeyd-şərtsiz yerinə yerinə yetirməyə vadar edən hansı səbəblərdir.
Geri qayıt