Saakaşvili ikinci inqilabı reallaşdıra biləcəkmi
18-10-2021, 10:21
Xəbər verdiyimiz kimi, Tiflisdə Gürcüstanın sabiq Prezidenti Mixail Saakaşvilinin tərəfdarları aksiya keçiriblər. Onminlərlə insanın qatıldığı izdihamlı mitinqin iştirakçıları təcili olaraq hökumətdən Saakaşvilini azadlığa buraxmağı tələb ediblər.
Mişa isə öz növbəsində həbsdən tərəfdarlarına məktub yollayıb. O, gürcü xalqını və bütün siyasi qüvvələri birliyə çağırıb. Ardınca əlavə edib ki, indi nə partiya, nə də bölünmə zamanıdır: “Gürcüstanı xilas etməyin əsl vaxtıdır”.
Gürcüstanda baş verənlər dünya gündəmini məşğul edən əsas mövzulardan biridir. Bəzi ekspertlər hesab edirlər ki, Saakaşvili həbsdən buraxılarsa və ya tərəfdarlarının aksiyaları davamlı olarsa, bu halda Gürcüstanda yenidən hakimiyyət dəyişikliyi qaçılmaz olacaq.
Gürcüstanın Vahid Milli Hərəkat Partiyasının üzvü, Marneuli bələdiyyəsinin üzvü Nərgiz Əliyeva AYNA-ya açıqlamasında deyib ki, Gürcüstanda siyasi böhran hökm sürür: “Bunun da əsas səbəbi hökumətin son dövrlər uğursuz siyasət yürütməsi ilə bağlıdır. Bu gün Gürcüstanda vətəndaşların hüquqları pozulur, insan haqları qorunmur, kriminal meyllər artıb, ölkədə təhlükəsizlik lazımi səviyyədə təmin edilmir, demokratik dəyərlər baxımından irəliyə yox, geriyə gedirik. Eyni zamanda sosial-iqtisadi problemlər dərinləşib. Bütün bunlar Gürcüstanı keçmişə qaytarır. Sözsüz ki, Gürcüstan ictimaiyyəti bununla barışmaq niyyətində deyil”.
“Mixail Saakaşvilinin hakimiyyətə gəlişi Gürcüstanda keyfiyyətcə yeni mərhələnin başlanğıcı oldu. Bu, ölkəmizin qarşısında böyük imkanlar açdı. Biz onun dövründə sabitlik və inkişafı bütün mənalarda dada bildik. Gürcüstanda korrupsiyanın kökü kəsildi, məmur özbaşınalığı halları aradan qalxdı, Avropaya inteqrasiya siyasəti gücləndi, ölkədə sabitlik hökm sürürdü. Lakin Saakaşvili gedəndən sonra hər şey geriyə getməyə başladı. Bu səbəbdən əhali yenidən Saakaşvilinin iqtidara qayıdışını istəyir. Son seçkilərdə də biz bunu aydın şəkildə gördük”, - deyə həmsöhbətimiz bildirib.
Onun dediyinə görə, Gürcüstanda hakimiyyət dəyişikliyi qaçılmazdır: “Hökumət əsassız və qanunsuz olaraq Saakaşvilini həbs edib. Ona qarşı respressiya siyasəti həyata keçirilir. Lakin Gürcüstan vətəndaşları bununla barışmayacaq. Keçirilən son izdihamlı aksiyalar bir daha bunun təsdiqi oldu. Saakaşvilinin azad olunması üçün əlimizdən gələni edəcək. Heç kimə bizə mane ola bilməyəcək. Çünki, Saakaşviliyə qarşı hörmətsizlik xalqa qarşı hörmətsizlikdir. Gürcüstan xalqı əlində gələni edəcək ki, o, azadlığa çıxsın”.
“Hesab edirəm ki, beynəlxalq birlik, demokratik dünya təsisatları da xalqa dəstək verəcək. Bütün bunların fonunda Gürcüstanda hakimiyyət dəyişikliyi labüddür. Həm də qaçılmazdır. Bir daha deyirəm, iqtidarın respressiv siyasəti və Saakaşvilini həbsdə saxlaması bunun qarşısını ala bilməyəcək. Saakaşvilinin dövründə biz “demokratiya zənciri”ni qırmışıq. Daha heç kim bizi o “zəncir”ə bağlaya bilməz. Gürcüstanın hazırkı rejimi xalqın tələblərini nəzərə almalıdır. Artıq güc və zorakılıq yolu ilə prosesi nəzarətdə saxlamaq mümkün deyil və bu əks effekt verəcək. Böyük ehtimalla, Gürcüstanda yeni seçkilər keçirləcək və bu seçkilərin qalibini xalq seçəcək. Bu qalib isə güman ki, Vahid Milli Hərəkat Partiyası və müttəfiqləri olacaq”, - deyə Əliyeva vurğulayıb.
“Turan” İnformasiya Agentliyinin rəhbəri, politoloq Mehman Əliyev də AYNA-ya şərhində söyləyib ki, son dövrlər Gürcüstan cəmiyyətində Mixail Saakaşvilinin nüfuzu yenidən yüksəlməyə başlayıb: “Baxmayaraq ki, hakim koalisiya qalib gəldi, lakin seçkilər gərgin rəqabət şəraitində keçdi. Əldə etdiyim məlumata görə, altı partiya seçkilər zamanı seçki qanunvericiliyinin tələblərini pozaraq, seçiciləri şirnikləndirici vədlərlə ələ almağa çalışıb. Tiflisə son səfərim zamanı bu ölkə vətəndaşları da bu faktı təsdiq etdilər. Seçicilərin pulla ələ alınması seçkilərin iddia edildiyi kimi, tam şəffaf və demokratik keçirilmədiyini söyləməyə əsas vermir. Təbii ki, Saakaşvilini özü də bunları bilirdi”.
“Burada söhbət təkcə seçkilərin nəticələrindən yox, insan haqlarının qorunmasından da gedir. Saakaşvili bu ölkənin rəhbəri olub, dövlətin inkişafı üçün müəyyən işlər görüb. Onu həbsdə saxlamaq yolverilməzdir. Təbii ki, bunu gürcü iqtidarı da anlayırdı. Lakin düşünürdü ki, özləri üçün gözlənilən siyasi təhlükəni bu yolla aradan qaldıra biləcəklər. Görünən odur ki, onlar buna nail ola bilmədilər. Saakaşvilinin azadlığı üçün keçirilən aksiyalar Gürcüstan iqtidarı üçün yaxşı heç nə vəd etmir”, - deyə analitik qeyd edib.
Onun fikrincə, Gürcüstanda yeni seçkilər keçirilə bilər: “Bu, artıq aydın görünür. Bu seçkilərdə isə çox güman ki, müxalif qüvvələr qalib gələcək. Hər şey aksiyaların davamından və Saakaşvilinin azadlığa buraxılmasından asılı olacaq. Gürcüstanda artıq hakimiyyəti dinc yolla dəyişmək ənənəsi mövcuddur. Ehtimalım ondan ibarətdir ki, gürcü iqtidarı etirazçı kəsimin tələblərini yerinə yetirməyə və erkən seçkilər keçirməyə məcbur olacaq. Beynəlxalq birlik də bu məsələdə Gürcüstan müxalifətinə dəstək verəcək”.
“Saakaşvilinin özünün dövlət rəhbərliyinə gəlməsi isə mümkün deyil. Heç onun özü də bunu arzulamır. Necə ki, İvanişvili heç bir rəsmi status daşımasa da, bu gün faktiki olaraq ölkəni idarə edir, Saakaşvili qalib gəlsə də, bu, yenə belə olacaq. Onun əsas məqsədi hakimiyyətə gəlmək yox, narazı elektoratı yenidən siyasi mübarizəyə təşviq etməkdir. Artıq müəyyən mənada buna nail olub”, - deyə Əliyev fikrini yekunlaşdırıb.
Geri qayıt