Göyçayda vətəndaşın DƏRDİNİ DİNLƏYƏN YOXDUR...
26-12-2022, 09:21
DİA.AZ: - Göyçay şəhəri Heydər Əliyev pr. 209 ünvanında yaşayan Rəhimova Validə Mahmud qızı tərəfindən ölkə rəhbərliyinə müraciət ünvanlanıb. Bir nüsxəsi də DİA.AZ-a daxil olan müraciətdə deyilir:
"Cənab Prezident! Yazaraq bildirmək istəyirəm ki, mən Rəhimova Validə Mahmud qızı 23 ildir ki, Göyçay şəhəri Heydər Əliyev prospektində yerləşən 106 Peşə Liseyinin yataqxanasında yaşayıram. İllərdir ki, qaldığımız yerdə su-kanalizasiya problemi ilə üzləşirik. Tavana sellofanlar vurmuşuq. Çünki binanın yuxarı mərtəbələrindən tökülən kanalizasiya suları üzərimizə axır. Davamlı olaraq tullantı suların hədəfinə çevrilən divarlar ovxam-ovxam gedir. Evin bütün əşyaları, o cümlədən də kravatlarımız belə rütubət içərisindədir. Binaya içməli su ümumi və sayğacsız verilir. Ən azı 1 ildən daha artıqdır ki, suyun krantı xarab olub. Bu isə içməli suyun boş yerə israf olması deməkdir. Bu cür su itkisi səbəbilə isti yay günlərində Göyçay Su Kanal İdarəsinin məsuliyyətsizliyi ücbatından sakinlərinin əksəriyyəti su üzünə həsrət qalır. Mən, Göyçay Su Kanal İdarəsi qədər öz vəzifəsinə qeyri-ciddi yanaşan, vətəndaşların problemlərini görməzdən gələn ikinci bir idarə və ya qurum tanımıram.
Müxtəlif xəstəliklərə düçar olan 15 yaşlı nəvəm 1 il öncə vəfat etdi. Bildiyiniz kimi, Azərbaycan Respublikasının Konstiyusiyasının 41-ci maddəsində: "İnsanların həyatı və sağlamlığı üçün təhlükə törədən faktları və halları gizlədən vəzifəli şəxslər qanun əsasında məsuliyyətə cəlb edilirlər".
Dəfələrlə "Azərsu" ASC Göyçay Su Kanal İdarəsinə müraciət etmişəm. İdarənin Kazım adlı vəzifəli şəxsinin yanında da olmuşam. Onlar mənə "İdarənin balansında kifayət qədər vəsait yoxdur" kimi müxtəlif bəhanələr gətirirlər. Beləliklə də adı çəkilən idarənin məsul əməkdaşları həm biz vətəndaşları incidirlər, həm də tonlarla suyun itkiyə getməsinə göz yumaraq dövlət büdcəsinə xeyli miqdarla zərər vururlar. Bu, Azərbaycan Respublikasının Cinayət Məcəlləsinin 314-cü (Səhlənkarlıq) maddəsinə əsas verir.
Sizdən çox xahiş edirəm, şikayətim yerində obyektiv araşdırılsın və problemlərimin həlli təmin olunsuz. Öncədən təşəkkürümü bildirirəm".
İddia olunanlarla bağlı dia-az.life olaraq qarşı tərəfi də dinləməyə hazırıq...
Geri qayıt