Təhsilimiz nə vaxt ağ günə çıxacaq?
21-10-2022, 10:33
Elm və təhsil naziri Emin Əmrullayevin müəllimlərin sertifikasiya imtahanları ilə bağlı söylədiyi fikirlər cəmiyyətdə ciddi müzakirə mövzusuna çevrilib. Nazirin “Sertifikasiya imtahanlarında iştirak edən 11 min müəllimdən 2 mini kvadratın perimetri veriləndə onun sahəsini hesablaya bilmir” bəyanatı fonunda, Nazirliyin də idarəetmə böhranı yaşadığı barədə tənqidlər tirajlanmağa başlayıb.
İddiaçılar hesab edirlər ki, Elm və Təhsil Nazirliyinin regional idarələri və onların nəzdində olan rayon təhsil sektorları faktiki fəaliyyətsizdir. Dərs cədvəllərinin hazırlanmasında meydana çıxan problemlər, onların gecikdirilməsi, təhsil səviyyəsinin yüksəldilməsindən danışan nazirlik rəsmilərinin buna həyata keçirə bilməməsi tənqid olunur.
Nazirin “Çox ciddi problemlə üz-üzəyik” açıqlaması da diqqətdən yayınmır: “Lakin bir qrup müəllim də oldu ki, bu gün tədrisi aparmaqla bağlı müəyyən bacarıqlarında problemləri var. Bu zaman sual ortaya çıxır ki, müəllim öz fənnini bilmirsə, onda sinif otağındakı azyaşlı şagirdə nə öyrədəcək? İmtahanda iştirak edən 2 min müəllim kvadratın perimetri veriləndə onun sahəsini hesablaya bilmir. Burada güzəşt etmək mümkündürmü? Əlbəttə, yox. Təhsildəki bu tip güzəştlər vətənə xəyanətdən daha ciddi problemdir. Yəni öz fənnini bilməyən müəllim 6 yaşlı uşağın gələcəyini əlindən alırsa, bundan pis nəsə təsəvvür edə bilmirəm”.
DİA.AZ-ın məlumatına görə, Elm və Təhsil Nazirliyi yanında İctimai Şuranın məsul katibi İlqar Orucov AYNA-ya açıqlamasında deyib ki, iki min müəllimin sertifikasiya imtahanlarında biabırçı nəticə göstərməsi uzun illər təhsil sektorunda mövcud olmuş rüşvətlə əlaqədardır: “Bilirsiniz ki, mən Elm və Təhsil Nazirliyinin rəsmi işçisi deyiləm. Bu nazirliyə yalnız ictimai bağlılığım var. Bir ictimai fəal və vətəndaş olaraq elm və təhsil naziri Emin Əmrullayevin fikirləri ilə tam razıyam. Uzaq olmayan keçmişdə təhsil, səhiyyə və digər sektorlarda rüşvətxorluq faktları olub və bunun nəticəsidir ki, bu gün bəzi müəllimlər çox aşağı nəticə göstərirlər”.
“Lakin bununla yanaşı, peşəkar pedaqoqlarımız da az deyil və “Azərbaycanda müəllimlərin səviyyəsi aşağıdır” iddiası ilə də çıxış etmək olmaz. Hər bir valideyn istəyər ki, övladı sağlam və keyfiyyətli təhsil alsın. Kim istəyər ki, öz fənnini bilməyən müəllim övladına dərs desin?! Yəqin ki, bunu istəyən yoxdur. Nazir də bu problemi qabardıb və burada qeyri-adi məqam axtarmağa da dəyməz. Çox təəssüf ki, sosial şəbəkələrdə bununla bağlı müzakirələr əsasən qeyri-ciddi səviyyədədir və təhsildən anlayışı olmayan adamlar da bu məsələyə rəy verirlər”, - deyə həmsöhbətimiz bildirib.
Onun sözlərinə görə, Elm və Təhsil Nazirliyinin fəaliyyətində həllini gözləyən problemlər var: “Təhsil strateji bir sahədir. Elə bir ailə yoxdur ki, bu sahəyə hər hansı formada aidiyyəti olmasın. Təbii ki, problemlər mövcuddur və bu, nazir səviyyəsində də etiraf olunur. Lakin Regional təhsil idarələrinin fəaliyyəti ilə yaxından tanış olan, onların rəhbərlərini tanıyan biri kimi deyə bilərəm ki, təhsil məmurları problemləri həll etməyə çalışırlar. Yəni, son illər neqativ yollarla bu sahədə vəzifəyə yüksələn məmurların olduğunu söyləyə bilmərik. İşə qəbul prosesi ədalətli formada aparılır”.
“Düzdür, iddialar var ki, bu sektorda yalnız təhsil işçiləri çalışmalıdır. Lakin təhsil ictimaiyyətinin nümayəndəsi, bir pedaqoq olaraq bu fikirləri bölüşmürəm. İdarəetmə menecerləri müxtəlif sahələrdə çalışmalı və onların potensialından istifadə edilməlidir. Hesab edirəm ki, təhsildə islahatlar aparılır və bunun real nəticələrini görmək üçün zamana ehtiyac var. Təkcə ümumtəhsil məktəblərində deyil, ali və orta ixtisas məktəblərində də problemlər mövcuddur”, - deyə Orucov vurğulayıb.
DİA.AZ-ın məlumatına görə, təhsil eksperti Kamran Əsədov isə fərqli düşünür. Nazirin son açıqlamasını AYNA-ya şərh edən ekspert söyləyib ki, nazirlik rəsmiləri məsuliyyəti sələflərinin üzərinə atmaq istəyirlər: “Onların dediyindən belə anlaşılır ki, bütün problemlər sabiq təhsil naziri Misir Mərdanovun günahı üzündən baş verib. Düzdür, onun dövründə ciddi problemlər mövcud olub. Müəllimlərin işə qəbulu zamanı ciddi qanunsuzluqlara yol verilib. O dövrdə diplomların elektron formada yoxlanılması mümkün olmayıb. Təhsildə kifayət qədər ciddi böhran yaşanıb”.
“Bunu başa düşdük, qəbul etdik. Bəs siz bu 10 ildə nələr etmisiniz? Bəlkə, bunun hesabatını verəsiniz?.. Axı bu illər ərzində 80 min müəllim işə qəbul etmisiniz”, - deyə müsahibimiz bildirib.
Əsədov iddia edir ki, ötən 10 il ərzində böyük miqdarda dövlət vəsaiti təhsilin inkişafı adı ilə xərclənib: “Amma nə dəyişib? Hansı dəyişikliklər baş verib? Əgər bu gün nazir özü təhsildən çox ciddi problemlərin olduğunu elan edirsə, deməli, dəyişən heç nə yoxdur. Daha nə qədər illər keçməlidir ki, Azərbaycan təhsili “ağ günə” çıxsın? Bəlkə, bundan danışasınız, cənablar! Bu müddətdə hansı kompleks yoxlamalar aparmısınız? Hansı zəruri islahatlar həyata keçirmisiniz? Əvvəlcə öz üzərinizə düşəni edin, sonra tənqid edin”.
Geri qayıt