Şəki sakininin işi düyünə düşüb
21-02-2018, 10:33
DİA.AZ: - Bir müddət əvvəl Şəki rayonu, Baş Göynük kənd sakini Məmmədov Ülkər İsmayıl oğlu DİA.AZ-a şikayət məktubu ünvanlamışdı. Narazı vətəndaşın müraciətində deyilirdi:
""Azəriqaz" ASC-nin Şəki rayon şöbəsinin işçiləri 2017-ci ildə nəhayət Baş Göynük kəndinə təbii qaz xəttini şəkib istifadəyə vermişlər. Bunun üçün cənab Prezidentə minnətdarlığımızı bildiririk.
Çox təəssüflər olsun ki, sayğacquraşdırma zamanı biz - qardaşım Məmmədov Mehrəli İsmayıl oğlu ilə ayrı-ayrı təssərüfat təşkil edib, bir evin ayrı hissələrində yaşasaq da, qaz idarəsi işçiləri iki ailə üçün bir sayğac qoyub gediblər. Biz onlara kənd icra nümayəndəliyindən ayrı-ayrı ailə kimi yaşadığımızı, təsəsrrüfat kitabında da ayrı olduğumuzu bildirən sənəd təqdim etsək də, qulaq asmaq istəmirlər. Deyirlər, bir evdə yaşayırsınız, iki ailə olsanız da... Bizə də icazə vermirlər ki, bir evə iki sayğac quraşdıraq. Məncə bu doğru məntiq deyil. Kim fikirləşib belə qərar qəbul edibsə. Deməli, mən və qardaşım təbii qazdan birlikdə istifadə etməliyik, birlikdə pulunu ödəməliyik. O zaman aramızda dava da düşə bilər ki, "sən qazı çox məsrəf etdin, mən az". O zaman ödəniş edəndə də bu məsləni dəqiqləşdirə bilməyəcəyik. Axı hər birimizin 55 və 58 yaşı var. Hər birimiz uşaqları ilə ayrıca yaşayırıq.
Cənab Energetika nazirindən, cənab Rövnəq Abdullayevdən və Əkbər müəllimdən bir daha xahişimiz budur ki, qoca anamla birlikdə ayrıca yaşayan qardaşım Mehrəli Məmmədova bir qaz sayğacı, mənim də ayrı yaşayan ailəmə ayrıca qaz sayğacının quraşdırılmasına köməklik göstərəsiniz".
DİA.AZ bildirir ki, eyni şikayətçi yenidən redaksiyamıza müraciət edib və bu dəfə onun probleminə yerli məmurların reaksiya verdiyini, amma probleminin yenə də həll olunmadığını qeyd edib. Narazı vətəndaşın son müraciətində qeyd olunur:
"Mənim şəxsi evimə hər təsərüfata və ailəyə görə qaz sayğacının qoyulması ilə bağlı 7 fevral tarixli müraciətimdən dərhal sonra məni Şəki QAZ İdarəsinin müdiri öz kabinetinə dəvət edib, bildirdi ki, "gərək şikayət etməzdən əvvəl bizə məlumat verəydin". Dedim ki, "axı Sizin işçilərinizlə dəflərlə bu barədə söhbət etmiş, kənd icra nümayəndəliyindən arayış da vermişdim". Kəndə qayıtdıqdan sabahı gün yenə qaz idarəsinin texniki işçiləri evimizə gəlib bildirdilər ki, bu çox çətin işdir. Hara müraciət etsək də, qaz sayğacı qoya bilməyəcəklər. Mən təkrar olaraq xahiş edirəm ki, problemimin həllinə köməklik edəsiniz".
dia-az.life olaraq qarşı tərəfi də dinləməyə hazırıq. Mövzu diqətimizdədir.
Geri qayıt