Lələtəpə döyüşçüsü birinci vitse prezidentdən kömək istəyir
23-08-2017, 11:14
Lələtəpə döyüşünün iştirakçısı, Beyləqan rayon sakini hazırda Beyləqan Hərbi Birləşməsininin N saylı hərbi hissəsinin müddətdən artıq həqiqi hərbi qulluqçusu Aslanov Azər Əbülfət oğlu ağır xəstəliyinin müalicəsi üçün birinci vitse prezident, Heydər Əliyev Fondunun prezidenti Mehriban Əliyevaya müraciət ünvanlayıb. Həmin müraciəti olduğu kimi təqdim edirik.
“Hörmətli birinci vitse prezdent Mehriban xanım Əliyeva!
Mən Beyləqan rayon sakini, hazırda Beyləqan Hərbi Birləşməsininin N saylı hərbi hissəsinin müddətdən artıq həqiqi hərbi qulluqçusu Aslanov Azər Əbülfət oğlu Lələtəpə yüksəkliyinin alınmasında fəal iştirakçılardan biri olaraq sizə müraciət edərək xəstəliyimin müalicəsi üçün kömək etməyinizi xahiş edirəm.
Çox hörmətli birinci vitse prezident Mehriban xanım Əliyeva!
Bir müddət müalicə aldığım Müdafiə Nazirliyi Mərkəzi Hərbi Poliklinikasında məndən götürülən qan analizində linfa xərçəngi aşkarlandı və müalicə olunmaq üçün Milli Onkologiya Mərkəzinə göndərildim. Bədənimin ağ ciyər orqanı yaxınlığında yerləşən linfada xərçəng xəstəliyinin mövcud olması Milli Onkologiya Mərkəzində təsdiqini tapdı və ilkin müalicə üçün lazımı köməkliklər edildi. Milli Onkologiya Mərkəzində 5 gün yatdıqdan sonra ikinci müalicəmin davam etdirilməsi üçün evə buraxılmışam.
Milli Onkologiya Mərkəzinin həkimləri müalicə olunaraq yaşamağım üçün maddi vəsaitin olmasını deyirlər. Ancaq 2 (iki) övlad atası olaraq ailə vəziyyətimin ağır olması, müalicə olunmağım üçün lazım olan vəsaiti əldə etməyim mümükün deyil. Hazırda qulluq etdiyim N saylı hərbi hissəsinin yarı qat əmək haqqından başqa gəlir yerim yoxdur. Xəstəliyimlə əlaqədar olaraq qulluq etdiyim N saylı hərbi hissədən yaxın günlərdə məni təxris etdikdən sonra isə müalicəm üçün heç cürə maddi imkan əldə edə bilməyəcəm.
Buna görədə son ümid yerim ölkəmin, dövlətimin Ali Baş Komandanı cənab İlham Əliyev və sizsiniz.
Çox hörmətli Mehriban xanım Əliyeva!
Azərbaycan Milli Ordusunun hərbi qulluqçusu olmaqdan şərəf duyuram və Ali Baş Komandan İlham Əliyevin rəhbərliyi ilə torpaqlarımızı düşməndən azad edəcəyimizə hər an inanmışam. Kaş içimdəki bu ağır xəstəliyə düçar olmaqdansa vətən uğurunda şəhid olaydım. Ancaq mən ümidimi itirməmişəm və hörmətli prezidentim İlham Əliyevə və sizə olan inamım daim ürəyimdədir.
Hörmətli Mehriban Əliyeva sizdən Azərbaycan Milli Ordusunun hərbiçisi kimi, vətəndaş kimi, 2 övlad atası kimi xahiş edirəm ağır xəstəliyimin müalicəsi üçün mənə kömək edin. Həkimlərimiz bu ağır xəstəliyin ölkəmizdə və xaricdə müalicə olunaraq bir müddət yaşamağın mümkün olduğunu deyirlər. Məhz məndə bir müddət yaşayıb torpaqlarımızın işğaldan azad olunmasını görmək istəyirəm. Çünki buna inanıram.
Çox hörmətlə: Azərbaycan Silhalı Qüvvələrinin Beyləqan Hərbi Birləşməsininin N saylı hərbi hissəsinin müddətdən artıq həqiqi hərbi qulluqçusu Aslanov Azər Əbülfət oğlu
Əlaqə nömrəsi (050) 447-82-32
Geri qayıt