Bu üsulla Vasif Talıbov ölkədən NƏ QƏDƏR PUL ÇIXARIB?
10-01-2023, 09:18
Naxçıvan Ali Məclisinin keçmiş sədri Vasif Talıbovun ailəsinə məxsus olan “Gəmiqaya şirkəti” MMC ölkədən pul çıxarıb əvəzində mal idxal etmədiyinə görə cərimələnib. Naxçıvan Şəhər Məhkəməsinin 5 yanvar qərarı ilə şirkətin köçürdüyü vəsaitin 20 faizi, yəni 3760 dolları cərimə kimi tutulub.
DİA.AZ bildirir ki, bu barədə Naxçıvan Şəhər Məhkəməsindən AbzasMedia-ya məlumat verilib.
Məhkəmədən bildirilib ki, Azərbaycan Mərkəzi Bankının İnzibati Xətalar Məcəlləsinin (İXM) 430.4-cü (avans yolu ilə ödənilmiş valyuta vəsaitinin müqabilində malların idxal edilməməsi, vəsaitin xaricdən geri qaytarılmaması) maddəsi ilə tərtib etdiyi 3 protokol icaata götürülüb.
“Bu vəsaitlər “Gəmiqaya şirkəti” MMC-dən Türkiyədə olan eyniadlı şirkətə köçürülüb. 1 oktyabr tarixində 18 min 800 dollar köçürülüb. Bununla bağlı məlumat 2 oktyabr tarixinə kimi verilməli olsa da, verilməyib. Bu iş üzrə qərar çıxarılıb, ümumi məbləğin 20 faizi qədər, yəni 3760 dollar miqdarında cərimə qərarı çıxarılıb” – deyə məhkəmədən bildirilib.
Qeyd olunub ki, 2 protokol üzrə məhkəmə baxışı isə 11 yanvara təyin edilib:
“Bu iki iş üzrə ümumi məbləğ 75 min və 28.454 dollardır. Bir köçürmə 24 noyabr 2020-ci ildə baş tutub, 25 noyabrda bununla bağlı məlumat verilməli olsa da, verilməyib. Digər köçürmə isə 30 noyabrda olub, 1 dekabra kimi məlumatlar təqdim edilməyib” – deyə məhkəmədən bildirilib.
“Gəmiqaya şirkəti” MMC Naxçıvan Ali Məclisinin sabiq sədri Vasif Talıbova məxsusdur. Onun oğlu Rza Talıbov uzun müddət şirkətin aid olduğu “Gəmiqaya Holdinq"in prezidenti olub.
Geri qayıt