"Ödədiyimiz vəsaiti geri almaq istəyirik, indi onu da vermirlər..."
8-10-2021, 10:06
Əvvəllər hər kəs xalçalarını həyətlərində, məhəllələrində yuyurdusa, artıq insanlar xalçayuma şirkətlərinə üz tuturlar. Bu şirkətlər arasında yaxşıları olsa da, pisləri də az deyil.
Sonxeber.az-ın redaksiyasına "Moni" xalçayuma şirkəti ilə bağlı şikayət daxil olub.
Belə ki, şikayətçi Nigar Salamova yuyulan xalçasından heç məmnun deyil.
O bildirib ki, xalçadan gələn nəmişlik iyindən dayanmaq olmur:
"Xalçaları apardılar, bir həftə ərzində qaytarıldı. Bu gün açdıq, amma əfsuslar olsun ki, çox pis qoxu gəlir. Bundan əlavə, üzərində bir ləkə əmələ gəlib və rənglər bir-birinə qarışıb. Narazılığımızı bildirdik, ödədiyimiz vəsaiti geri almaq istəyirik, indi onu da vermirlər. Nə dərəcədə düzgündür? Həm məhsula zərər yetirilib, həm də vaxtımızı alıblar. Bu cür qeyri-peşəkar şirkətlər bağlansa, yaxşıdır.
Diqqətlə baxsanız, xalçanın astar tərəfi tamamilə saralıb, halbuki cəmi 1 ildir, alınıb. Saçaq hissələrində ləkələr var. Dəfələrlə zəng etmişik, verilən vəsaiti geri almaq istəmişik, günü günə satırlar, o nömrədən bu nömrəyə göndərirlər, ortada da bir şey yoxdur. Başqa bir xalçayuma şirkətinə zəng etdim, dedilər ki, bu şirkətdən şikayət edən artıq 7-ci müştəriyik".
Şirkətlə əlaqə saxlamağa çalışsaq da, zəngimiz cavabsız qaldı. Qarşı tərəfin mövqeyini dərc etməyə hazırıq.
Geri qayıt