Səbinə İlyasova: "Açıq geyinmək üçün arıqlayıram"
12-03-2015, 09:05
DİA.AZ əməkdar artist Səbinə İlyasovanın Milli.az-a müsahibəsini təqdim edir:
- Səbinə xanım, uzun müddət efirdə olmadınız, sonra arabir göründünüz və son vaxtlar yenidən yoxsunuz. Nə baş verir?
- Efirə köhnə repertuarla çıxmaq istəmirəm. Yeni repertuarım üzərində işləyirəm, mahnılarım aranjman edilir. Hazır olanları da var, olmayanları da. İndi əsas işim yeni mahnılarımdır.
- İşlədiyiniz bəstəkar var?
- Düşünürəm ki, köhnə mahnılarımı aranjman etdirsəm, daha yaxşı olar. Məsələn, Nailə Mirməmmədlinin 15 mahnısını oxumuşam. O vaxt yazdırdım, efirə çıxarmadım. Onlar yeni mahnı kimi səslənəcək. Ələkbər Tağıyevin də bir neçə mahnısını oxumuşam.
- Bəlkə, gənc bəstəkarlarla işləmədiyiniz üçündür ki, gündəmin nəbzini tuta bilmirsiniz?
- Gənc bəstəkarların mahnıları mənim xoşuma gəlmir.
- O mahnılarda nəyi bəyənmirsiniz?
- (düşünür) Yaxşı mahnılar deyil də. Mənim musiqi zövqümə uyğun gəlmir.
- Amma bu gün tələbat məhz o mahnılaradır.
- Gərək o mahnıları min dəfə oxusunlar ki, tamaşaçının yadında qalsın. Yəni yaddaqalan mahnılar deyil.
- Son dəfə efirdə nə vaxt olmusunuz?
- Bu yaxınlarda ANS-də “Günəbaxan” verilişində oldum. Heç bir ay olmaz.
- Deyirlər ki, şan-şöhrət çox vəfasızdır, insanı tərk edə də bilir. Necə düşünürsünüz, əvvəlki qədər tanınırsınız, yoxa sizi unudublar?
- Heç kim məni unutmayıb, haraya gedirəmsə, hamı da tanıyır. Ola bilər ki, 15-20 yaşlı gənclər və yeniyetmələr tanımasınlar. Orta və yaşlı nəsil isə məni tanıyır.
- Son illər səhnəmizdə gənclərin açıq-aşkar hegemonluğu var. Bunu yaşlı sənətkarların məğlubiyyəti kimi qiymətləndirmək olarmı? Demək istədiyim odur ki, sanki hazırda sizin nəsil sənət adamları sanki ikinci plandadırlar.
- Bu, məğlubiyyət deyil. Birincisi, bizim özümüzdən asılıdır. Deyirlər ki, hər aşiqin bir dövranı var.
- Belə çıxır ki, sizin dövranınız keçdi?
- Yox, dövranımız keçmədi. Artıq illər ötdükcə adamda əvvəlki həvəs qalmır. Gənclik illərində olan enerji, istək yoxdur.
- Onda siz yaşlanmaqla da barışmısınız...
- İndi oxuyan gənclər də iyirmi ildən sonra bizim indiki durumumuzda olacaqlar. Çünki onda da yeni nəsil gələcək, bunlar köhnələcəklər. Yeni ideyalarım var. Bilirsiniz, bu, ya tənbəllikdir, ya arxayınlıq. Düşünürsən ki, artıq sözümü demişəm də. Amma etiraf edim ki, belə düşünmək doğru deyil.
- Hesab edirsinizmi ki, sənətdə sözünüzü lazımınca deyə bilmisiniz?
- Əlbəttə. Sənətdə sözümü demiş müğənniyəm. Özümü tərifləmirəm, amma bu, reallıqdır.
- Sözünüzü deyib kənara çəkilmisiniz...
- Kənara çəkilməyimin çox səbəbləri var. Ailəmdə olan problemlərin də burada müəyyən təsiri oldu. Dayandım, indi sürət yığmalıyam. Bunun üçün də kömək lazımdır.
- Sponsoru nəzərdə tutursunuz?
- Yox, yaxşı dostları. Məsələn, siz zəng vurdunuz, bir az da həvəsləndim. Sponsor istəmirəm. Sponsor dəli deyil ki, sənə havayı pul xərcləsin. Özün bilirsən də... Mən real söhbət edirəm.
- Sizə belə təklif olub?
- Gənclik illərimdə çox olub.
- Bəs son illərdə?
- Olmayıb, olsa da qəbul etmərəm. Dedim axı, mən “sponsor” sözünü sevmirəm.
- Gənclik illərinizdə olan sponsorluq təklifi hansı şərt qarşılığındaydı?
- Mənimçün heç bir şərt qoyulmayıb. Amma çox ağıllı olduğum üçün təklifin arxasında nəyin dayana biləcəyini hiss etmişəm. Ona görə də elə təklifləri qəbul etmirdim.
- Səhnəmizdəki baxımlı xanımlardan birisiniz və bu, kompliment deyil. Düşünürsünüzmü ki, indi sizə sponsor təklifinin olmaması ona dəlalət edir ki, artıq illər öz işini görür?
- Sən demək istəyirsən ki, biz qocalmışıq?
- Elə demədim...
- Qoy bir az arıqlayım, qocalmadığımı sübut edəcəyəm (gülür). Sadəcə, məndə kompleks yaranıb. Bilirəm ki, çox baxımlı olmuşam. Amma indi özüm-özümü qane etmirəm. Özümə tənqidi mövqedən yanaşıram və bu da gözəl bir şeydir. İnsan öz mənfi cəhətlərini mütləq görməlidir.
- Dəyişən nədir?
- Bir az kökəlmişəm. Gombul deyiləm e, sadəcə, istədiyim çəkidən 15 kilo uzağam. İndi 81 kiloyam.
- Gənc ifaçılardan kimləri dinləyirsiniz?
- Düzünü deyim ki, bu gün mahnı janrında heç kimi dinləmirəm. Aralarında yaxşıları var. Ancaq hayıl-mayıl olduğum ifaçı yoxdur. Muğam ifaçılarından Kamilə Nəbiyeva ifası ilə məni şok eləmişdi. Bu yaxınlarda əməkdar artist fəxri adı alan Babək Niftəliyevə, Güllü Muradovaya, Ehtiram Hüseynova qulaq asıram. Güllünün segahına qulaq asanda kövrəlirəm. Ehtiramın səsi isə Tələt Qasımovun səsini xatırladır. İlkin Əhmədova da məmnuniyyətlə qulaq asıram. Mahnı janrında isə Röyanı dinləyirəm. O da gənc ifaçı deyil, artıq sözünü deyib.
- Əvvəl çox müasir, bir az açıq geyinirdiniz. Çəki atsanız, yenə əvvəlki kimi geyinəcəksiniz?
- Bəs elə ona görə arıqlayıram da. Həmişə müasir geyinmişəm, indi ölçülərim imkan vermir. Xoşladığın geyimləri geymək üçün mütləq arıq olmaq lazımdır. Çəkim məndə kompleks yaradır. Əvvəlki Səbinə olmaq istəyirəm. Efirə çıxanda heç kim deməsin ki, əvvəl beləydi, indi yaxşı görünmür. Halbuki hamı deyir ki, heç dəyişməmisiniz. Etiraf edim ki, yalandan təriflənəndə xoşum gəlmir.
Geri qayıt