"Bu, Allahın seçimidir, qudam da deyir ki, sən artıq qalibsən..."
9-08-2024, 17:25
2024-ci ilin 1 sentyabr tarixində keçiriləcək növbədənkənar parlament seçkilərinə qatılan əməkdar artist Elza Seyidcahan Teleqraf.com-un suallarını cavablandırıb.
Onunla müsahibəni təqdim edirik:
- Elza xanım, 23 saylı Nəsimi-Səbail seçki dairəsindən namizdəliyinizi irəli sürdünüz. Məram və məqsədiniz barədə nə deyə bilərsiniz?..
- Bəli, iki dəfə parlament seçkilərində namizədliyimi 54 saylı Şabran-Siyəzən seçki dairəsindən irəli sürmüşəm və artıq üçüncü dəfədir bu şərəfli yola qədəm qoymuşam. Bu dəfə əvvəlkilərdən fəqli olar... Bu, mənim üçüncü cəhdimdir. Hər dəfə təcrübə toplamışam. Ona görə inanıram ki, bu seçkilərdə yaxşı nəticə əldə edəcəm. Seçki şüarım budur: “Mən yenə gəldim”.
Seçkidən söz düşən kimi mənə zəng edirdilər ki, Elza xanım, siz yenə Şabran-Siyəzən seçki dairəsindən namizədliyinizi irəli sürmüsünüz? Namizədliyim qeydə alındıqdan sonra da zəng edib deyirlər ki, sizin namizədliyinizi Şabran-Siyəzən seçki dairəsindən gözləyirdik.
Seçicilərimin məni səbrsizliklə Şabranda, Siyəzəndə gözləmələrinə rəğmən Allah belə qismət etdi ki, namizədliyimi 23 saylı Nəsimi-Səbail seçki dairəsindən irəli sürməli oldum.
- Elza xanım, seçki dairəsini dəyişdirməkdə məqsədiniz nədir?
- Allahın seçimidi... Heç ağlıma da gəlməzdi ki, 23 saylı Nəsimi-Səbail seçki dairəsindən namizədliyinizi irəli sürəcəm. Mənim evim də Şabrandadır. Maraqlıdır ki, seçki dairəsi ilə evimin yaxınındadır. Bundan öncə iki dəfə seçkilərə qatılanda Şabran-Siyəzənə gedirdim, iki ay orada qaldım, təbliğat-təşviqat kampaniyasında seçicilərimlə görüşdüm.
Bu dəfə imza toplayanda yaşadığım Nəsimi rayonunun sakinlərini, qonşularımı, yaxın məhəllələri müşahdə edir, insanların qonaqpərvərliyini, zəhmətkeşliyini görürdüm. Hər seçki ərəfəsində gözəl insanlar tanıyıram. Mən hər bir layiq namizədə uğurlar arzu edirəm. Bu, hər bir insan üçün şərəfli bir yoldur, nə xoş ki, Allah bunu mənə üçüncü dəfə də nəsib etdi.
Jurnalistlər mənə sual veridilər ki, bu il namizədliyinizi hansı rayondan irəli sürəcəksiniz? Onlara cavab verirdim ki, “göyün yeddinci qatından namizəd olacam”. Onsuz da hər birimiz Allah tərəfindən seçilmişik, Allah istəməsəydi dünyaya gəlməzdik. 23 saylı Nəsimi-Səbail seçki dairəsi ilə də yaşadığım ev yox yaxındır.
- Həmin dairədən rəqibiniz bəstəkar Aygün Səmədzadənin atası Ziyad Səmədzadədir. Onun fəaliyyətini necə dəyərləndirirsiniz? Ziyad Səmədzadəyə qalib gələcəyinizi düşünürsünüzmü?
- Əslində, çox sevinirəm. Bu da təsadüfdən doğuran zərurətdir. Mənim üçün böyük şərəfdir ki, akademik Ziyad Səmədzadə kimi insanla tərəf-müqabiləm, adım onunla yanaşı çəkilir. 23 saylı Nəsimi-Səbail seçki dairəsi mənim seçimim olmadı. Yenə də deyirəm, mən göyün yeddinci qatından gəlmişəm.
- YAP-dan isə rəqibinz "Bakı Tikiş Evi"nin direktorunun oğlu Elnur Rəhimovdur. Bu rəqibiniz barədə nə düşünürsünz?
- Mən hər kəsə uğurlar arzulayıram. Bütün layiq olanların yolu açıq olsun.
- 2024-ci ilin 1 sentyabr tarixində keçiriləcək növbədənkənar parlament seçkilərinə aid şeir yazmısınızmı?
- Bəli, şeir yazmışam. Yaxın günlərdə ikinci şeirlər kitabım da nəşr ediləcək. Şeirin adı "Ölülərə mikrofon"dur.
Şeiri təqdim edirəm:
Xiyabana çatıram,
Pərişanla baxıram.
Niyə kədərlənməyim?
Səbəbindən qaçıram.
Yubiley gəlir, gün gəlir,
Güllü axınlar gəlir,
Anım gəlir, il gəlir.
Ölü addımlar gəlir,
Xiyabanı izləyir,
Dirilməyi istəyir.
"Ölüyə" mikrofon verin.
Fikrətin həyatını,
O bilir sətir-sətir.
Qaranın yollarını,
O çalır həzin-həzin.
Müslümun avazını,
Tofiqin mahnısını,
Niyazinin baxışını,
Sehirli çubuğunu,
Arif əfsanəsini,
Ölülərə çatdıran,
Mikrofonu qaldırın,
Qulaqları açdırın,
Gözlərə işıq verin,
Ürəkləri yandıran,
Musiqiyə səs verin.
Fəxri Xiyaban bizə,
Mikrofonlu söz desin.
"Ölülərimiz" dirilsin,
Musiqilər sevinsin.
Ətrafımız ayılsın.
Torpaqımız açılsın,
Fəxri Xiyaban əl çalsın.
Onu da deyim ki, parlament seçkilərində qalib gəlsəm, bir neçə təkliflə çıxış edəcəm. İnsanlar Fəxri Xiyabana gedir və oranı ziyarət edirlər. Mən arzu edirəm ki, hər zaman Fəxri Xiyabanda Cövdət Hacıyevin simfoniyaları, Müslüm Maqomayevin, Fikrət Əmirovun, Arif Məlikovun simfonik əsərləri səsləndirilsin. Təkliflərimdən biri budur.
Eləcə də ləhcə ilə danışan aparıcı və müğənnilərin televiziyaya çıxmasına qadağa qoyulsun. Digər təklifim isə Bakının qədim məhələsi olan "Kubinka"da ayda bir dəfə evlərin səliqəsi nəzarətə alınsın. Həyətləri də nəzarətə alınmalıdır. Hollandiyada belə hal var.
Təkliflərimdən biri də evdar xanımlara gələcəkdə maaş verilməsiylə bağlıdır. Qızlarımız daha çox karyera qurmağa yox, ailə qurmağa can atsınlar.
- Millət vəkili seçilsəniz, müğənnilik fəaliyyətinizdən uzaqlaşacaqsınızmı?
- Mən bəstəkar-müğənniyəm, millət vəkili olsam da sənətimdən uzaqlaşmaram. Mən elə mahnılar oxumuram ki, sənətdən uzaqlaşım. Çünki mənim musiqilərim elə əsərlərdir ki, onlar sənət baxımından əhəmiyyətlidir.
Musiqi ruha qidadır. Hərbi vətənpərvərlik mövzusunda 46 mahnım var. Ona görə düşünmürəm ki, müğənnilikdən uzaqlaşacam. Sadəcə şou-proqramlara getməyəcəm. Millət vəkilliyimdən aldığım maaşın yarısını seçicilərimə paylaşacam. Çünki öz sənətimdən pul qazanmağı bacarıram. Mən bu günə qədər xeyriyyə işləri də görmüşəm. Bir neçə insanı ödənişsiz əməliyyat elətdirmişəm.
- Seçki kampaniyası üçün maliyyə məsələsini necə həll edəcəksiniz? Bunun üçün maddi imkanınız varmı?
- Allahın köməyi həll edəcəm. Yenə deyirəm, bu yolu özüm gəlməmişəm. Bəzən elə bir şey olur ki, istəsən də həyata keçmir. Mən seçkilərə çox gec qatıldım. Hətta seçki dairə seçki komissiyasına gələndə komissiya sədri dedi ki, artıq gecdir, çatdıracaqsınızmı? Sanki Allah mənə güc verdi. Bir gün ərzində sənəd məsələsini həl edib, müraciət elədim. Heç ağlıma da gəlməzdi ki, öz yaşadığım ərazidən namizədliyimi verərəm.
- Siyasətlə nə dərəcədə maraqlanırsınız? Müğənnilik sənəti və siyasət fəqli sahələrdir.
- Ən böyük siyasət düzlük deməkdir. Bəzən siyasətin deyə bilmədiyi bir sözü incəsənət çox asanlıqla deyir. Mən sözümü yetərincə musiqi sahəsində demişəm, hərbi-vətənpərlik mahnılarımla, layihələrimlə və sair.
Uzun illərdir, hörmətli millət vəkillərimizlə tədbirlərdə çıxış edirik, hərbi hissələrə gedirik. Mərhum millət vəkili Qənirə Paşayeva və digər millət vəkillərimiz ilə... Yəni mənim siyasət sahəsiylə bağlı təcrübəm var.
- Seçkidə uduzsanız nə edəcəksiniz?
- Mən növbədənkənar parlement seçkilərində uduzmamışam, artıq qalibəm. Mənim qudam Akif bəy mənə deyir ki, "Elza xanım, sizin namizədliyiniz təsdiqləndi. Qeydiyyatdan da keçmisiniz. Siz ən böyük uğuru qazanmısınız. Artıq qalibsiniz. Qeydiyyatdan keçmək hər insana nəsib olmur".
Məni ruhlandıran qudama təşəkkürümü bildirirəm. Bu, doğrudan da böyük bir uğurdur. Mən imza toplayan zaman evlərə gedəndə bir az çəkinirdim. Mənə deyirdilər ki, Elza xanım, niyə siz gəlmisiniz, siz ulduzsunuz, əməkdar artistsiniz, köməkçiləriniz gəlsinlər... Əgər mən millət vəkiliyəmsə, həyətlərə də gedəcəm, evləri də gəzəcəm. İnsan öz işinin həm xadimi, həm də xadiməsi olmalıdır.
İmza toplayarkən bir daha gördüm ki, sadəlik gözəl xüsusiyyətdir. İnsanlar ünsiyyəti sevirlər. Çox qonaqpərvərdirlər. Mən imza toplayarkən şəhid ailələrinin də evinə getdim. Hər kəs mənə dəstək oldu. Bilirəm ki, mənim üçün nə qədər sevinirlər...
Geri qayıt