"Sağ olsun... Xatirədən bizim görüb, görəcəyimiz o oldu"
5-12-2023, 09:28
Xalq artisti İslam Rzayevin bacısı qızı Arzu Şəmiyeva “O üz” verilişinə müsahibə verən müğənni Xatirə İslamın dediklərini yalanlayıb. Xatirə İslam müəllimi İslam Rzayev üçün yubiley təşkil etdiyini bildirib. Mərhumun qohumu isə “İslam Rzayevin xatirəyə ehtiyacı yox idi. Xatirə özü deyirdi ki, İslam müəllimin adı mənim üçün yaşıl işıqdır” deyə münasibət bildirib.
Moderator.az-a açıqlama verən Arzu Şəmiyeva həqiqətləri olduğu kimi söylədiyini bildirib.
“Xatirə dayımın tələbəsi olub. Hamıya o təmənnasız kömək edirdi. Pul düşkünü deyildi. Nəyinsə xatirinə tələbələrinə dərs deməyib. Əgər tələbənin istedadı var idisə, ona yol göstərirdi. Xatirə anası ilə dayımın evinə gəlirdi. Dayım da, ailəsi də Xatirəyə hər zaman hörmətlə yanaşıb. Xatirəyə sual verin ki, sən heç bir dəfə də olsa İslam müəllimin bacısı, bacısı övladları ilə ünsiyyətdə olmusan? Maraqlanmısan? Bizimlə münasibəti yox idi. Xəstəxanada bir dəfə yaxınlaşıb bizimlə salamlaşdı. Təxminən 7-8 il əvvəl anam sağ idi. Bircə dəfə Xatirəyə İslam Rzayevin bacısı kimi zəng edib bacım oğlunun toyuna dəvət etdi. O da axşam saat 10-da gəlib 10 dəqiqəlik 2 mahnı oxuyub getdi. Sağ olsun. Xatirədən bizim görüb, görəcəyimiz o oldu” deyə sənətkarın qohumu bildirib.
Arzu Şəmiyeva deyir ki, Xatirə İslam Rzayev üçün yubiley təşkil etməyib.
“İslam müəllim həm prezident təqaüdü alırdı, həm Milli Konservatoriyada çalışırdı, həm İncəsənət universitetində, həm də Muğam teatrının bədii rəhbəri idi. Onun nəyə ehtiyacı var idi? Onun Xatirənin köməyinə ehtiyacı var idi sizcə? Yubiley tədbirində bir çox sənətkarlar var idi. Onu Muğam teatrının rəhbəri Arif Qazıyev təşkil etmişdi. Həmin yubiley youtube sosial platformasında da var. İslam dayım Xatirəyə qavalını hədiyyə edəndə Xatirə banket açmışdı. O yəqin ki, yubileylə banketi qarışdırır. Onda belə çıxır ki, “Şöhrət” ordenini də dayıma Xatirə vermişdi?! Bu nə deməkdir? İslam Rzayev Xatirədən heç vaxt istifadə etməyib. Özü efirlərdə deyirdi ki, İslam Rzayev adı mənim üçün yaşıl işıqdır. Xatirə mərd qızdır. Sadəcə dediyi sözlər verilişdə xoşuma gəlmədi deyə etirazımı bildirdim” deyə Arzu Şəmiyeva deyib.
Geri qayıt