“Gündə ölüm qorxusu ilə yaşayıram, gecə tez yatıram ki, o fikirlər başımdan çıxsın”
1-03-2023, 09:37
“35 yaşında ana statusunu qazanmışam. Bəzən oturub düşünürəm ki, birdən mənə nəsə olar, övladım balacadır. Gündə 3-4 dəfə mənə ölüm qorxusu gəlir. İstəyirəm ki, gecə tez gəlsin ki, o fikirlər başımdan çıxsın. Oturub ağlayıram, o qorxular məni incidir. İnsanlara sevinc, gülüş bəxş etsəm də, həyatda tam başqa xasiyyətdə olan insanam”.
DİA.AZ bildirir ki, bunu Moderator.az-a açıqlamasında tanınmış və sevilən müğənni Xuraman Əlizadə deyib.
“Gözəllik salonunda vaxt keçirməyi sevmirəm. Çalışıram ki, hər şeyi özüm edim. Ona görə yox ki, salonda pul çox xərclənir. Bu vaxt baxımından da mənə çox xeyir edir. Əgər bunu özüm bacarıramsa, niyə artıq pul xərcləməliyəm ki? Büdcəmə də qənaətdir” deyə aktrisa bildirib.
Xuraman Əlizadə bildirib ki, hər zaman dərdini tamaşaçılardan gizlədib.
“Biz efir insanlarıyıq, efir qarşısına çıxırıq, heç kimə aidiyyatı yoxdur ki, sənin bu gün əhvalın var ya yoxdur?! Mənim üzüm həmişə gülür. Özüm üçün kənara çəkilib kədərlənə bilərəm, amma tamaşaçı qarşısına gülər üzlə çıxmağı da bacarıram. O vaxt “Nuş olsun” verilişini aparırdım. Gecə saat 4 radələrində nənəm rəhmətə getmişdi. Mən də səhər canlı efirə çıxmalı idim. Nənəmi hələ dəfn etməmişdilər, mən canlı yayıma çıxdım. Valideynlərim məni danladılar ki, yerinə başqa aparıcı çıxsın. Bir gözüm ağlaya-ağlaya, biri gülə-gülə gəlib efiri idarə etdim. Qonaqlarımız da Rafael və Coşqun idi. Həmin günü efirdə hiss etdirmədim ki, nənəm dünyasını dəyişib” deyə sənətçi bildirib.
Aktrisa Xuraman Əlizadə bildirib ki, ailəsinin sirrini heç kimə verməyi sevmir.
“Nə evimin sirrini, nə evimdə olan sözü, söhbəti heç vaxt anama demərəm. Qızlar var ki, ana ilə rəfiqədirlər, evdə olan bütün söz-söhbət ananın ovucundadır. Ana da onu öyrədir. Ailədirlər də, necə istəyirlərsə yaşasınlar. Elə bir ailə yoxdur ki, söz-söhbət olmasın. O pulluya-pulsuza baxmır ki. Xanımlara tövsiyyəm odur ki, həyat yoldaşlarınızı boş buraxın. Nə qədər boş buraxsanız, evə tez dönüb gələcək, sizi daha çox sevəcək. Vallah bunu mən öz həyatımdan bilirəm” deyə aktrisa bildirib.
Geri qayıt