İcra başçısının əsas pulyığanlarından biri 5 milyonla qeybə çəkilib...
27-08-2015, 09:58
Binəqədi rayon İcra Hakimiyyətinin başçısı yaxın ətrafına daxil olan birinin "dələduzluğ"unun qurbanı olub. Binəqədidə 16 insanın həyatına son qoyan məşum yanğından, sonra icra başçısının təşvişə düşən pulyığanlarından biri Xaləddin İsgəndərova çatacaq 5 milyon manatla ölkəni tərk edib.
Bu barədə Editor.az-a məlumat verən mənbə iddia edir ki, artıq bir neçə aydır ki, Xaləddin İsgəndərov gizli şəkildə ölkəni tərk edən Çingiz Məmmədovu tapmağa və pullarını geri qaytarmağa çalışır. Amma icra başçısının bu səyləri nəticə vermir.
Editor.az-ı məlumatlandıran mənbəninin bildirdiyinə görə, Xaləddin İsgəndərovun əsas pul kisələrindən biri olan Məmmədov Çingiz Cavanşir oğlu başçıya çatacaq 5 milyon manatı götürərək aradan çıxıb. Bildirilir ki, əslən ağdamlı olan Çingiz Məmmmədov Binəqədi rayonunda tikilən villalara qeyri-rəsmi nəzarəti həyata keçirib. Belə ki, Binəqədidə 3 mərtəbədən artıq olan villaların qeyri-rəsmi icazəsi üçün Çingiz Məmmədov Xaləddin İsgəndərovun adından villa sahibləindən 150 min manat alırmış. Bu pulu verməyənlərə isə Çingiz Məmmədov villa tikməyə icazə vermirmiş. Bəzən isə təməli atılan villaları sökürmüş.
Mənbə bildirir ki, Çingiz Məmmədovun ölkədən çıxardığı 5 milyon manat bir ay müddətində toplanan vəsait olub. Yəni Xaləddin İsgəndərovun təkcə villaların tikintisinə verdiyi “icazədən” aylıq gəliri faktiki olaraq bir neçə milyon manat olub.
Bundan başqa icra başçısı sıravi insanların Binəqədi rayonunda tikdiyi evlərə verdiyi “icazə” üçün hər ay külli miqdarda pul qazandığı haqqında dövrü mətbuatda davamlı olaraq məlumatlar yayılıb.
Belə məlumatlardan biri də bir neçə ay əvvəl AzFakt.com saytında yayılıb. Binəqədi İcra Hakimiyyəti tərəfindən təkzib olunmayan həmin məlumatda göstərilirdi ki, Binəqədidə icra başçısına tabe olan mütəşşəkil dəstə fəaliyyət göstərir. Mütəşəkkil dəstəyə Orxan, Nicat, Zaur, Ramin, Fuad, Arif və başqa bir neçə nəfər daxildir. Həmin dəstəyə isə Xaləddin İsgəndərovun ailə sürücüsünün oğlu Orxan adlı şəxs başçılıq etdiyi qeyd olunurdu. Göstərilirdi ki, dəstə Binəqədi rayonunda tikinti işlərinə bütün nəzarəti həyata keçirir.
Sayt yazırdı ki, Binəqədidə heç kim Orxanın qeyri-rəsmi razılığı olmadan daşı-daş üstünə qoya bilməz. Orxan və dəstəsi açıq şəkildə Binəqədi rayonunun ərazisindəki qəsəbə və kəndlərdə terror küləyi əsdirirlər. Hər şeyin öz qiyməti var və qiymətlər bir qayda olaraq dəyişir. Ortalama olaraq isə bir mərtəbəli ev üçün 10 min manat, iki mərtəbəli ev üçün 20 min manat, mansard üçün 5 min manat alırlar. Mütəşəkkil dəstə bu vəsaiti almadan heç kimə tikinti aparmağa icazə vermirlər. Tikinti aparan şəxslərin isə evlərini başlarına yıxırlar. Qəribə odur ki, həmin dəstə heç bir rəsmi funksiya daşımır, sadəcə icra başçısı Xaləddin İsgəndərovdan «külli-ixtiyar» aldıqlarını bildirirlər. Mütəşəkkil dəstəninin başçısı Orxan, Nicat adlı şəxslərin Biləcəri icra nüaməyəndəsində, Arif və Fuadın Binəqədi kənd icra nümayəndəsində işlədiyi bildirilir. Qeyd edilir ki, Orxan adlı şəxsin 99 HH 434 nömrəli “Niva” markalı avtomobili ilə gün ərzində öz dəstəsi ilə rayon ərazisini gəzərək tikinti aparan şəxslərin işini dayandıraraq “hesabını” almamış əl çəkmir.
Məsələ ilə bağlı Binəqədi İcra Hakimiyyətinin və icra başçısı Xaləddin İsgəndərovun mövqeyini dərc etməyə hazırıq.
Geri qayıt