Şəkidə icra başçısından narazılıqlar ərşə dirənib
19-11-2014, 11:42
Şəki Şəhər İcra Hakimiyyətinin başçısı Elxan Usubovun fəaliyyəti son zamanlar rayon sakinlərinin ciddi narazılığına səbəb olur. Bu və digər bir sıra önəmli məqamlarla bağlı redaksiyamızı bilgiləndirən məlumatlı şəxsin sözlərinə görə, icra başçısı əhalini narahat edən problemləri həll etməkdə maraqlı görünmür. Belə ki, Elxan Usubovun əsas diqqətini məhz şəxsi maraqlarının təmin olunmasına yönəltdiyini qeyd edən mənbə iddia edir ki, icra başçısı elə bu səbəbdən də şəkililərə, daha doğrusu, onların problemlərinin həllinə lazımınca vaxt ayıra bilmir.
Elxan Usubovun 2007-ci ildən 2011-ci ilin may ayınadək Ağstafa Rayon İcra Hakimiyyətinin başçısı vəzifəsində çalışdığını xatırladan məlumatlı şəxsin sözlərinə görə, ağstafalılar da onun əməllərinindən hər zaman şikayətçi olublar: "Elxan Usubov Ağstafanın icra başçısı olanda rayon sakinlərinin və ümumiyyətlə, rayonun başına hansı oyunlar açdığı artıq çoxlarına bəllidir. Onun Ağstafada törətdiyi əməllər və onlardan yaranan ciddi fəsadlar hələ də yerli sakinlərin yaddaşından silinməyib". Elxan Usubov Şəki Şəhər İcra Hakimiyyətinin başçısı vəzifəsinə təyin olunduqdan sonra bütün önəmli strukturlara özünə yaxın olan adamları təyin etdiyini deyən məlumatlı şəxs qeyd edir ki, icra başçısı vətəndaşlarla tez-tez görüşlər keçirib, onların problemlərilə maraqlanmaq əvəzinə Şəki camaatına qarşı böyük haqsızlıqlar edir: "Şəki sakinləri də təsdiqləyə bilərlər ki, Şəki-Oğuz yolunun üstündə yerləşən istirahət mərkəzlərinin bir çoxu icra başçısına məxsusdur". Bundan başqa, Elxan Usubovun Şəkidəki süd zavoduna da şərik olduğu deyən məlumatlı şəxsin sözlərinə görə, M.F.Axundov prospektində yerləşən "Şəki" oteli, Kiş kəndindəki "Narınqala", "Şam bağı", "Cənnət bağı", Dağüstü park deyilən yerdəki "Panaroma" oteli də Şəki Şəhər İcra Hakimiyyətinin başçısının nəzarətindədir: "Ümumiyyətlə, Elxan Usubovun idarəçiliyi rayon camaatını qətiyyən qane etmir. İcra hakiminin bir-birini sıralayan qanunsuzluqları artıq şəkililəri təngə gətirib. Onu da qeyd edim ki, Gürcüstanın dövlət idarələrində çalışan bəzi şəxslərlə münasibət yaradan icra başçısı orda özünə böyük fındıq zavodu tikdirib. Şəkidə yetişdirilən fındıq və qozun böyük hissəsinin məhz Gürcüstandakı zavoda daşındığı deyilir. Təxmini hesablamalara görə, zavodun illik istehsal gücü 500 min tondan çoxdur". Hazırda Şəkidəki Xan Sarayına giriş üçün həm piyadalardan, həm də sürücülərdən pul alındığını vurğulayan mənbə bildirir ki, vaxtilə adıçəkilən tarixi məkana giriş pulsuz olub: "Şəhər ərazisindəki digər mədəniyyət və turzim məkanlarına da giriş pulludur. İlin istənilən vaxtında bu yerlərə turistlərin gəldiyini nəzərə alsaq, kifayət qədər məbləğ yığılır. Bəs, bu vəsaitlər hara və necə xərclənir?.." Şəki şəhər icra başçısının yerli sahibkarlarla yola getmədiyini, daha doğrusu, onlara göz verib işıq vermədiyini deyən məlumatlı şəxsin iddiasına görə, rayondakı bir sıra təmir-bərpa işləri məhz yerli sahibkarların hesabına görülüb: "İcra başçısı Şəkinin ən məşhur istirahət zonalarından olan "Marxal" istirahət mərkəzinin sahibinə normal fəaliyyət göstərməyə imkan vermir. Görünür, burada da Elxan Usubovun hansısa məqsədi var".
Bu arada, artıq bir müddətdir ki, Şəkinin icra başçısının böyük çətinliklərlə üz-üzə qaldığını qeyd edən dia.az-ın yaydığı informasiyada bildirilir ki, bu ilin iyul ayında ölkə başçısı Şəki rayonuna 3,3 milyon manat vəsaitin ayrılması üçün sərəncam imzalamışdı. Sərəncama görə, Şəki şəhərinin Aşağı Göynük-Baş Göynük-Baş Şabalıd avtomobil yolunun tikintisinin davam etdirilməsi məqsədilə Azərbaycan Respublikasının 2014-cü il dövlət büdcəsinin dövlət əsaslı vəsait qoyuluşu xərclərinin bölgüsündə kəndlərarası avtomobil yollarının tikintisi və yenidən qurulması üçün nəzərdə tutulmuş vəsaitin 3,3 milyon manatı Şəki Şəhər İcra Hakimiyyətinə ayrılırdı. Qeyd olunur ki, artıq bu ilin 9 ayının hesabatının verilməsi zamanı, habelə 2014-cü ilin yekun hesabatının hazırlanması prosesində böyük çətinliklər yaranıb: "Belə ki, Şəki rayonunun yerli maliyyə işçiləri heç cür büdcə vəsaitinin xərclənməsi ilə bağlı rəqəmləri uyğunlaşdıra bilmirlər. Söhbət təxminən, yarım milyon manata yaxın vəsaitin mənimsənilməsinin ört-basdır edilməsindən gedir". Həmin informasiyada iddia olunur ki, konkret olaraq icra başçısı tərəfindən məhz yol tikintisinin inşası üçün ayrılan vəsaitdən götürülən həmin yarım milyon manatlıq payın "rəsmiləşdirilməsinə", digər dövlət qurumları da heç də maraqlı görünmədiklərindən Elxan Usubovun maliyyəçiləri əməlli-başlı çıxılmaz vəziyyətə düşüblər. Bunun isə icra başçısına baha başa oturacağı heç şübhəsizdir...
Mövzu ilə bağlı əldə etdiyimiz başqa bir məlumatda isə bildirilir ki, son vaxtlar Şəki Şəhər İcra Hakimiyyətinin başçısının yeni-yeni qayda və istəkləri ortaya çıxmağa başlayıb. Belə ki, məlumatlı şəxsin sözlərinə görə, Elxan Usubovun ən böyük hobbilərindən biri onun qardaş Türkiyədə çəkilməkdə olan "Kurtlar Vadisi Pusu" serialının heç bir bölümünü buraxmamasıdır: "Deyilənlərə görə, icra başçısı adıçəkilən serialın böyük həvəskarıdır. Hətta rayon camaatı arasında onun Polad Ələmdarın geyindiyi kostyumların eynisini aldırdığı və personajın istifadə etdiyi geyimlərdən yararlandığı da söylənilir. Bundan başqa, onun danışıqlarında serialdan götürülmüş ibarələrdən istifadə etdiyi də deyilir. Elxan Usubovun Polad Ələmdar vurğunluğu o qədər çoxdur ki, eyni adlı şirkət belə yaratdırıb. "Ələmdar P" MMC adlı həmin şirkət Şəkinin abadlaşmasından tutmuş, dəftərxana ləvazimatlarının alınmasına qədər əksər işlərdə iştirak edib. Şəki Şəhər İcra Hakimiyyətinin sifarişilə "Ələmdar P" MMC-nin hesabına dəftərxana ləvazimatlarının alınması üçün xeyli vəsait köçürülüb. Yəqin ki, müvafiq qurumlar bu məsələni ciddi və obyektiv şəkildə araşdırsalar, hələ bir çox mətləblərə aydınlıq gətirilə bilər". \\ gundelik-baku.com \\
Məsələ ilə bağlı qarşı tərəfin də mövqeyini işıqlandırmağa hazırıq.
Geri qayıt