«Bank of Baku»dakı həbslər Ziya Məmmədova sarı uzana bilərmi
5-03-2014, 09:57
DİA.AZ: - Hələ xeyli əvvəlindən məlumat verərək bildirmişdik ki, ölkənin bank sektoruna müdaxilə olunacaq və artıq 4 bankın - «Bank of Baku», «XalqBank», «UniBank» və «KapitalBank»ın başı üzərində qara buludlar görünməkdədir. Doğrudur, həmin bankların hamısının fəaliyyətinin birdəfəlik olaraq qadağan ediləcəyi gözlənilmir. Amma bu bankların filialları və mərkəzi ofisləri ciddi şəkildə təftiş olunacaq ki, belə bir tədarüklə bağlı indidən bəzi informasiyalar yayılıb.
Konkret olaraq isə «Bank of Baku» və «XalqBank»ın isə fəaliyyətinə qadağa qoyulacağı şübhəsizdir. Bu barədə DİA.AZ-ı bilgiləndirən mənbə iddia edir ki, dünən MTN-nin «Bank of Baku»da əməliyyat keçirməsi, həbslər həyata keçirməsi təsadüfi deyil və bu həbslərin miqyası daha da genişlənə bilər.
Mənbənin söylədikləri: «Bu bank İrandan ötürülən çirkli pulların əsas yuyulma ünvanı olmaqla yanaşı, həm də Azərbaycanda gizli İran xəfiyyəsinin mühüm maliyyə qaynağı kimi çıxış edir».
Qeyd edək ki, bu barədə hələ məşhur «VikiLiks» sənədlərində də qeyd olunurdu. Bakıdan o zamanlar ABŞ Dövlət Departamentinə hesabat verən Amerikanın Azərbaycandakı sabiq səfiri xanım Enn Dörsinin məxfi qrifli sənədlərində bildirilirdi ki, «NAB» dış Ticaretin rəhbərləri olan Oromi qardaşları Azərbaycanda nəqliyyat naziri Ziya Məmmədovun himayəsi altında böyük şəbəkə qura biliblər.
Bu şəbəkəyə «Bank of Baku», «Royal Bank of Baku», «XalqBank», «Hyundai Auto Azerbaijan», «Baku Electronics» və sairə qurumlar daxildir. Və bu bank və qurumların xətti ilə hər ay İrandan Azərbaycana ötürülən 5 milyon ABŞ dolları həcmində çirkli pul yuyulur.
Doğrudur, həmin ərəfədə bu faktlar o qədər də ciddiyə alınmadı. Çünki ortada hələ də vəzifə başında olan nəqliyyat naziri Ziya Məmmədov faktoru mövcuddur. Faktlar da sübutlayır ki, Ziya Məmmədov naməlum şəraitdə 8 magistral yolun podratını məhz «iranlı iş adamlarına» verib. Eyni zamanda onların əməkdaşlıqları - şübhəli əlaqələri ayrı-ayrı bank hesablarına külli miqdarda pul köçürmələrində də nəzərə çarpıb.
Artıq hərəkətlənmənin başlandığı bir şəraitdə dia.az-a maraqlı informasiyalar da daxil olub. Xəbəri verən mötəbər mənbə iddia edir ki, «Bank of Baku» ilə bağlı hələ də rəsmi qaynaqların dolğun bilgi verməməsi sırf olaraq «yuxarıların» «dobro»sunna bağlı olan bir məsələdir: «Əslində ortada böyük bir cinayət və xəyanət faktı var. Və bu fakt üzrə təkcə bank işçilərini yox, onları himayə edən onlarla məmuru belə həbsə yollamaq mümkündür. Hadisələrin inkişafı da məhz xeyir-duanın alınmasına bağlı olduğundan bu gün hətta həbs olunduğu xəbəri yayılan «Bank of Baku»nun müşahidə şurasının sədri Elçin İsayev də «mən həbs olunmamışam» şəklində açıqlamalar verə bilir. Amma vəziyyət kifayət qədər qəlizdir».
Bütün tərəflərin mövqeyini işıqlandırmağa hazırıq…
Geri qayıt