"And olsun müqəddəs Qurana ki, yazdıqlarımız hamısı həqiqətdir"
8-03-2016, 10:27
Redaksiyamızın elektron ünvanına daxil olmuş şikayət ərizəsində Ucar rayon Əhalinin Sosial Müdafiə Mərkəzinin fəaliyyətindən doğan narazılıqlar öz əksini tapmışdır. On nəfər vətəndaş tərəfindən imzalanmış bu ərizədə Ucar ƏSMM-nin direktoru vəzifəsini müvəqqəti icra edən Oruc Piriyev və mərkəzin əməkdaşı Hicran Məmmədovaya qarşı ciddi iradlar irəli sürülür. Ərizədə deyilir: “Biz, Ucar rayon sakinlərinin yoxsulluq həddindən də aşağı səviyyədə yaşamalarına səbəb olan Ucar rayon Əhalinin Sosial Müdafiə Mərkəzinin direktoru vəzifəsini müvəqqəti icra edən Oruc Piriyevlə, mərkəzin əməkdaşı Hicran Məmmədovanın korrupsiya fəaliyyətini bizim iştirakımızla, hərtərəfli və obyektiv araşdırılmasını xahiş edirik. Bu korrupsionerlər bizim kimi yoxsulların haqqını yeyib, kapital toplamaqla məşğuldular ki, nəticədə də bizim ailələrimiz səfalət içərisində yaşamağa məhkum olurlar. Bu şikayətə imza edənlərin hamısı bir neçə ay öncə sosial yardım almaq üçün Ucar rayon ƏSMM-nə qanunu qaydada sənədlər təqdim etmişdik. Bizim qarşımızda Oruc Piriyevlə, Hicran Məmmədova şərt qoydular ki, ya əvvəlcə 800 manat verməlisiniz, ya da 6 ay sosial yardım kartı bizdə qalacaq. Biz buna razı olmadıq deyə, gələn ay sənədləriniz göndəriləcək – deyərək, bizi aldadıb, dünən (02.03.2016) isə, bizi çağırıb sənədlərimizi özümüzə qaytardılar ki, artıq kompyuter sistemi ilə sənəd qəbulu başlayıb. Guya buna görə, Əmək və Əhalinin Sosial Müdafiəsi Nazirliyi sənədləri qəbul etmədi. Əslində isə, yuxarıda göstərdiyimiz kimi, bu korrupsiyaya qurşanmış Oruc-Hicran cütlüyünün şərtləri ilə razılaşmadıq deyə, bizim sənədləri uzun müddət saxlayıb, sonda özümüzə qaytardılar. Bu açıq-aşkar cinayət faktıdır ki, yoxlanılmasına zərurət var. Şəxsən çox sayda adamlar tanıyırıq ki, onlara qanunla ünvanlı sosial yardım düşməsə də, Oruc-Hicran cütlüyü rüşvət alıb, onlara yuxarı məbləğdə yardım təyin etdiriblər. Əgər bizim iştirakımızla Ucar rayonunda bu istiqamətdə araşdırma aparılarsa, həmin siyahını təqdim edəcəyik. Həmin saxta “yoxsulların” bahalı avtomobilləri, mal-qoyun sürüləri, torpaq sahələri və bir çox imkanları var ki, buna rayon sakinləri təəcüblənirlər. Bu cinayəti törədən Oruc-Hicran cütlüyü əməlli-başlı kapitalistə çevriliblər. Oruc Piriyev Ucarın Qulabənd kəndində yaşayır. Ancaq indi, rayonun mərkəzindən 50.000 manata ev almaq istəyir ki, buna görə bir-neçə evə baxsa da, xoşuna gələni olmamışdır. Bu adamda hətta əqli çatışmazlıq var deyə, anormal hərəkətlər də edir. Sizə təqdim etdiyimiz şəkildə o, Heydər Əliyev Mərkəzindəki iclas zalında tribunanın üstündə oturub, şəkil çəkdirib və bu şəkili utanmadan sosial səhifəsində paylaşmıışdır. Hansı ki, tirbuna hörmətlə yanaşılası bir yerdir. Gününü sərxoşluqla keçirən Oruc Piriyevə orta məktəb vaxtı sinifdə uşaqlar “dəli Oruc” deyiblər. O, yaşadığı Qulabənd və qonşu Alpı kəndində saxta arayışlarla çox sayda adamlara qanunsuz olaraq ünvanlı sosial yardım təyin etmişdir ki, siyahını yoxlamaya təqdim edəcəyik. Həmin arayışı kənd soveti sədri (icra nümayəndəsi – red. ) ilə əlbir olub alıblar ki, ailə tərkibini düzgün qeyd etməyiblər və komissiya zamanı göz yumublar. Belə oxşar saxtakarlıqlara Hicran Məmmədovanın da nəzarət etdiyi sahələrdəçoz yol verilib. Hicran Məmmədova çirkin yolla əldə etdiyi belə qazanc hesabına bahalı avtomobillərə, möhtəşəm villalara sahib olmuşdur. Bizi isə, qanuni, halal haqqımızdan məhrum edib, ailəmizi, azyaşlı körpə uşaqlarımızı aclığa məhkum ediblər. Xahiş edirik, ünvanlı sosial yardım alanların siyahısı olan internet səhifəsində Ucar rayon siyahısına baxın. Orada himayəsində iki azyaşlı uşağı olan Qarabörk kənd sakini Musayev Mirsafa Niyazı oğluna 10 manat 89 qəpik sosial yardım təyin edilmişdir. Hicran Məmədova ona 170 manat sosial yardım təyin edilməsi üçün 6 ayın pulunu istəmişdi, razı olmadığı üçün ona belə bir məbləğ yazılmışdır. Ancaq Ucar rayon Əhalinin Sosial Müdafiə Mərkəzinin işçisi Gülxarə xanımın bacısı oğlu İbrahimov Əfqan Xudayar oğluna 299 manat yardım təyin edilmişdir. Hansı ki, Əfqan İbrahimovun 18 yaşdan yuxarı iki övladı və böyük bir torpaq sahəsi var ki, onu qeydə aldırmayıblar. Ucar rayonu Rəstəcə kənd sakini Həsənova Əfsanə Fizuli qızının sənədləri 1 ildir Ucar rayon Sosial Müdafiə Mərkəzində olsa da, hələ də gözləyir. Sadəcə olaraq Oruc-Hicran cütlüyünə istədikləri rüşvəti verməyə imkanı yoxdur. Hüseynov Teymur Qnyaz oğlunun da 8 aydır sənədləri orada yatır. O, maddi imkansızlığa görə xəstə uşağını müalicə etdirə bilmədiyi üçün, azyaşlı uşaq dünyasını dəyişdi. Yenə də rüşvət verə bilmədiyi üçün Qazyan kənd sakini Sadıqova Gözəl Tərlan qızı 1 ildir sənədlərini versə də hələ gözləyir. Yoxsul Ucar sakinlərinə qənim kəsilimiş Oruc Piriyev və Hicran Hüseynova sosial yardım təyin edilməsi üçün çəkinmədən rüşvət istəyirlər və bu qanunsuzluqlarına belə don geyindirirlər ki, “qoyulan haqqı nazirliyə verməsək yardım təyin edilmir”.
Biz, yoxsulluq həddindən də aşağı həddə yaşayan Ucar rayon sakinləri, Prezident cənab İlham Əliyevdən bu korrupsioner cinayətkar cütlük barədə tədbir görməsini xahiş edirik. Cənab Prezident, bu cinayətkarların fəaliyyəti yoxlanılıb, məsuliyyətə cəlb edilməlidirlər. Əmək və Əhalinin Sosial Müdafiəsi naziri cənab Səlim Müslümov, mümkün olarsa, şəxsən özü gəlib bu qeyd etdiyimiz faktları bizim iştirakımızla yerində yoxlasın və bütün obyektiv həqiqətləri gözü ilə görsün. İnanırıq ki, korrupsiyaya qurşanmış Oruc-Hicran cütlüyünün bu qanunsuz əməllərindən nazir cənab Səlim Müslümovun məlumatı yoxdur. Bu cinayətkar cütlük öz maraqlarına görə naziri də, hətta Prezidenti də aldadarlar. Cənab nazir, biz, bu müraciətə imza edən, yoxsulluq həddində yaşayan Ucar rayon sakinləri yolunuzu gözləyirik. Xahiş edirik, müraciətimizi nəzərə alasınız. And olsun o bir olan Allaha, müqəddəs Qurana ki, şikayətimizdə yazdıqlarımız hamısı həqiqətdir.
Biz Sizə inanırıq, Sizdən kömək gözləyirik.”
Geri qayıt